Afg‘oniston hukumati 31-avgust kuni sodir bo‘lgan kuchli zilziladan so‘ng qidiruv-qutqaruv operatsiyalarini to‘liq yakunladi.

Bu haqda Kunar viloyati gubernatori Qudratulloh Abu Hamza Al Jazeera telekanaliga ma’lum qildi.

“Zilziladan keyin omon qolganlarni qidirish ishlari yakunlandi. Halok bo‘lganlar soni 2204 kishiga yetdi, deyarli 4000 kishi jarohat oldi”, — degan u.

Zilzila epitsentri joylashgan hudud rahbari hukumat jabrlanganlar va ko‘chirilganlarni joylashtirish uchun chodirlar jiddiy tanqisligiga duch kelayotganini ta’kidlagan.

Ma’lumot uchun, 1-sentyabrga o‘tar kechasi yuz bergan 6 magnitudali zilzilada qurbonlarning aksariyati Kunar viloyatidan bo‘lgan. Undan keyin 4,5–5,2 magnitudali aftershoklar qayd etilgan. Afg‘oniston aholisi asosan paxsa devorli uylarda yashagani bois vayronagarchilik ko‘lami keng bo‘lgan. Afg‘oniston Hind va Yevrosiyo litosfera plitalari to‘qnashgan hududda joylashgani uchun seysmik xavfi yuqori bo‘lgan mamlakat hisoblanadi. Bundan tashqari, Sharqiy Afg‘onistonning tog‘li hududlari ko‘chkilarga moyil hisoblanadi.

• Afg‘oniston
• Zilzila