Kartoshka ko‘pchilikning sevimli mahsuloti bo‘lishi bilan birga, taom tayyorlashda ham  asosiy o‘rinlarda turadi. Taomning xushta’m bo‘lishi kartoshka sifatiga bog‘liq bo‘lsa, uni qanday qilib tayyorlash oshpazning zimmasida. Quyida uy bekalari va oshpazlar uchun kartoshka pishirish tartibi haqida ma’lumotlar berib o‘tamiz. 

Pyure tayyorlaymiz

Kartoshkani sovuq suvga solib qaynatish kerakmi yoki issiq?

Bozor rastalarida kartoshkaning qizil, sariq, yuvilgan, yuvilmagan va boshqa bir qator turlarini uchratish mumkin. Uning xilma-xil tayyorlanishi ham tanlangan kartoshka turiga bog‘liq. Ammo ming afsuski, kartoshkaning mazasini ko‘rinishiga qarab bilish qiyin. Shuningdek, qaysi kartoshka qancha muddatda pishishini ham aniqlay olmaysiz. Natijada uning tayyor bo‘lishini ancha vaqt kutishga to‘g‘ri keladi! 

Agar siz kartoshkani qaynatilgan holda yemoqchi bo‘lsangiz sovuq suvga solib qaynating. Agar undan pyure tayyorlash rejasi bo‘lsa, avvaliga sovuq suv, keyin esa issiq suvga solib olish kerak bo‘ladi.
 
Sovuq suvga solingan kartoshka yarim soat qaynatiladi (issiqlik harorati 70 darajadan ortmasligi kerak). Shundan so‘ng, suvi to‘kiladi va issiq suvga solinadi. Keyingi bosqichda yaxshilab quritiladi.

Suvga butunligicha solish kerakmi yoki bo‘laklarga bo‘lib?

Kartoshka bir xilda pishib, qaynashi uchun uni bir xil hajmdagi bo‘laklarga bo‘lish tavsiya etiladi. Agar butunligicha solsangiz, ulardan biri pishib-pishmay qoladi. Yoki chala pishgan bo‘ladi.  

Mazali pyure tayyorlash uchun qancha yog‘ va sut kerak bo‘ladi?

Xushta’m pyure uchun 1 kg. kartoshkaga 400 gr. sariyog‘ qo‘shish kerak. Kartoshka po‘stidan tozalanadi va ustiga yog‘ solinib, yaxshilab aralashtiriladi. Agar pyureni darhol dasturxonga tortish kerak bo‘lsa, unga issiq sut solish tavsiya etiladi (1 kg. kartoshkaga 100 gr. sut).
  
Kartoshkani qanday ezish kerak?

Ayrim oshpazlar kartoshkani pyure holatiga keltirish uchun uni qoshiq bilan ezishadi. Yana ayrimlar esa blenderdan foydalanadi. Yuqori tezlikdagi mexanik aralashtirish vaqtida kartoshka tuzilishiga zarar yetadi: ko‘p kraxmal ajralib chiqadi. Oqibatda pyure yelimga o‘xshab yopishqoq bo‘lib qoladi. Rangi ham o‘zgaradi.

Kartoshkani qovurib tayyorlaymiz

Qovurilgan kartoshkani tayyorlashning ham o‘z sirlari mavjud. Avvaliga kartoshkani vino sirkasi solingan suvda qaynatib olish kerak bo‘ladi (2 litr suvga 2 oshqoshiq sirka solinadi). Kartoshka sal pishay deganda, suvi to‘kib tashlanadi va shundan so‘nggina yog‘da qovuriladi.
 
Agar sarimsoqpiyozli kartoshka tayyorlamoqchi bo‘lsangiz, uni kartoshka tayyor bo‘layotgan vaqtda qo‘shing. Piyozni alohida qovurib olib, keyin tayyor mahsulotga aralashtirib yuborsangiz ham bo‘laveradi.

Nima uchun qaynatish kerak?

Kartoshka birdan yog‘ga solib qovurib olinsa, u bir xilda pishmaydi. Avvaldan qaynatilsa, ichi yaxshi pishadi. Keyin esa faqatgina ustini yog‘da qovurib olish qoladi. Qarabsizki, qirsillagan kartoshkalar tayyor bo‘ladi.

Qovurish jarayonini o‘rtacha balandlikdagi olovda amalga oshirgan ma’qul. Unga qo‘shimcha ta’m bag‘ishlash uchun ustiga sariyog‘ solib yuborsa ham bo‘ladi. Tuz solishni esa qovurishning oxiriga qoldiring.

Nargiza UTEPOVA tayyorladi.