Ko‘pchilik chuchvara tayyorlashni juda oson yumush, deb o‘ylaydi. Yillar davomida qon-qonimizga singib ketgan ko‘nikmalar bilan buni, hatto ko‘zim yumuq holatda ham uddalayman, deydiganlar topiladi. Biroq uning o‘ta injiq taom ekanligini ham tan olish lozim. Chunki, agar sal adashsangiz, tansiq taomga emas, ezilgan xamir bo‘laklariga ega bo‘lishingiz hech gap emas.
 
Xo‘sh, chuchvara tayyorlash uchun qancha miqdorda un ishlatish lozim? Xamirni qanday yoyish kerak? Tugilgan chuchvarani qanday suvga tashlash lozim? Shu kabi qator savollarga javob topish maqsadida biz chuchvara tayyorlash borasidagi xatolar xususida so‘z yuritamiz.

Masalliqlar proporsiyasi

Chuchvara tayyorlash mobaynida ichidagi masalliqlar proporsiyasiga e’tibor qarating. Xamir juda qattiq bo‘lib ketsa, uni yoyishga ham qiynalasiz. Suvga tushganda esa pishishi ham qiyin bo‘ladi. 
Bundan qochish uchun quyidagi retsyeptdan foydalaning:
3 stakan un
0,5-0,75 stakan suv;
1 choy qoshiq tuz;
1 dona tuxum.
Tuxum katta-kichikligiga qarab suvni kamaytirish yoki ko‘paytirish mumkin. Qattiq bo‘lib ketsa, biroz suv qo‘shish ham mumkin. Faqat buni birdaniga qilmang. Agar xamir juda yumshoq bo‘lib qolsa, unga ozroq un qo‘shish ham mumkin.

Xamir uchun issiq suv ishlatish

Juda ko‘p retseptlarda xamir qilish uchun issiq suvdan foydalanish lozimligi tavsiya etiladi. Biroq bu maslahat chuchvara xamiriga to‘g‘ri kelmaydi. Unga faqat sovuq suv kerak. Hatto, xona haroratidagi suvda ham xamir zich va qattiq bo‘lib qoladi. 

Yaxshisi suvni muzlatgichda sovutib olgan ma’qul. Oxir-oqibat siz yumshoq va elastik xamirga ega bo‘lasiz. Undan ideal chuchvaralar tugish mumkin.

Xamir qilgan zahoti yoyishni boshlash

Ko‘pchilik uy bekalari chuchvara uchun xamir qilgan zahoti uni yoyishga tushib ketishadi. Oxir-oqibat uni yupqa qilib yoyguncha qiynalib ketishadi. Yaxshisi xamirni plyonka paketga o‘rab, bir soat muzlatgichda saqlang. Bu vaqt davomida un xamirni elastik qilish xususiyatiga ega kleykovina ishlab chiqaradi.

Chuchvara ichiga juda ko‘p miqdorda qiyma solish

Albatta, chuchvara ichida ko‘p qiyma bo‘lgani yaxshi, biroq me’yoridan oshirmagan ma’qul. Birinchidan, juda ko‘p qiyma solinsa, uni tugish qiyinlashadi. Ikkinchidan, qaynash davomida chuchvara ichidagi qiyma shishib, xamir yorilib ketadi. Shu tariqa chuchvara ichidagi suv chiqib ketadi va u bemaza, quruq bo‘lib qoladi. 

Chuchvaralarni muzlatmasdan pishirish

Oshpazlar tavsiyasiga ko‘ra, chuchvaralarni muzlatib, so‘ng pishirish kerak ekan. Muzlatilmagan chuchvaraning xamiri juda ingichka va yumshoq bo‘ladi. Suvga bo‘kkan chuchvara ezilib ketishi turgan gap. Muzlatilgan chuchvaralarning tirik qolish imkoniyati yuqori.
Muzlatilmagan chuchvarani faqat oz-ozdan, katta kastryulkaga solib pishirish kerak.

Sovuq suvga solib pishirish

Ko‘pchilik bu tajribaning achchiq mevasini allaqachon tatib ko‘rgan. Yana bir bor eslatamiz: chuchvarani faqat qaynab chiqqan suvga tashlash lozim. Sovuq suvga tushganda u ezilib, ochilib ketadi.

Chuchvarani ko‘p-ko‘pdan pishirish

Chuchvaralar me’yorida qaynashi uchun qozonda o‘z “shaxsiy hududi”ga ega bo‘lishi kerak. Agar siz birdan ko‘p miqdorda chuchvara solsangiz, suv sovub qoladi. Sovuq suvda pishgan chuchvara qay ahvolga tushishini esa aytib o‘tdik. 

Pishgan chuchvaraning suvi oqib ketishini kutmaslik

Mana, taom ham tayyor bo‘ldi. Siz mazali, yoqimli, xushxo‘r chuchvaralarni pishirib oldingiz. Biroq endi shoshilmang. Chuchvaralarni durshlagga solib, ortiqcha suv chiqib ketishini kuting. 

Ana shunda unga keyinroq qo‘shiladigan yog‘ va qatiq chuchvara tarkibiga singadi va ularni yanayam mazali qiladi.
Agar shu tavsiyalarimizga amal qilsangiz, chuchvaralaringiz doim xushxo‘r va ideal shaklda bo‘lishi turgan gap.