“Yurtimiz diplomatlari Turkiyaning Mersin viloyatidagi vatandoshlar holidan xabar oldilar”, – deb xabar qilmoqda “Dunyo” axborot agentligi.

Safar xorijda vaqtincha mehnat faoliyatini amalga oshirayotgan O‘zbekiston fuqarolariga konsullik-huquqiy yordamlar ko‘rsatish va O‘zbekistonda chet elda mushkul ahvolda qolgan o‘zbekistonliklarni qo‘llab quvvatlash maqsadida e’lon qilingan “Vatanga qaytarish” insonparvarlik aksiyasi doirasida tashkil etilgan.

Tashrif doirasida Mersin viloyatidagi o‘zbekistonliklar uchun sayyor konsullik qabuli tashkil etilgan. Sayyor qabul davomida 18 nafar fuqarolarga “Vatanga qaytarish” xayriya insonparvarlik aksiyasi doirasida Migratsiya jamg‘armasi mablag‘lari hisobidan aviachipta xarid qilib berilgan. Ular “Uzbekistan Airways” aviakompaniyasi tomonidan tashkil etilgan charter reys bilan Antaliya-Toshkent yo‘nalishi bo‘yicha vatanga qaytarilgan.

Bundan tashqari, tashrif davomida O‘zbekiston fuqarolarini uyushgan holda joylashtirish maqsadida Mersin viloyatidagi “Asya Fel Group” kompaniyasi mas’ullari bilan muzokara o‘tkazilgan.

Muzokaralar davomida kompaniya direktori Eren O‘zturk Turkiyaning Nigde viloyatida yangi qurilayotgan ishlab chiqarish fabrikasiga ishchi kuchiga ehtiyoj borligini bildirgan va ushbu bo‘sh o‘rinlarga O‘zbekiston fuqarolarini jalb qilishga tayyorligini ta’kidlagan.

Ma’lumot uchun, “Asya Fel Group” kompaniyasi 2010-yilda issiqxona materiallari ishlab chiqarish maqsadida tashkil qilingan. Shuningdek, mazkur korxona Navoiy viloyatida 147 gektar maydonda issiqxona barpo qilgan.

• O‘zbekistonlik
• Turkiya
• fuqaro