Mamlakatning Guandun provinsiyasida iyuldan buyon chikungunya virusiga chalinish bilan bog‘liq 7000 dan ortiq holat aniqlangan. Mahalliy ma’muriyat vakillari hududda karantin choralarni ko‘rmoqda.

Chikungunya virusi chivinlar orqali tarqaladi. U isitma hamda bo‘g‘imlarda kuchli og‘riq keltirib chiqardi, alomatlar ba’zan yillar davomida yo‘qolmasligi mumkin. Ushbu virus odamdan odamga yuqmaydi – uning tashuvchisi faqat chivinlar hisoblanadi. Ya’ni, virusga chalinish uchun uni yuqtirib olgan odamni chaqqan chivin chaqishi kerak bo‘ladi.

Xitoy rasmiylariga ko‘ra, hozircha chikungunyaga chalingan bemorlarning barchasida yengil shakldagi simptomlar kuzatilmoqda va bemorlarning 95 foiziga bir hafta ichida javob berib yuborilmoqda. Chikungunya epidemiyalari Janubiy va Janubi-Sharqiy Osiyoda, shuningdek, Afrikada tez-tez uchraydi, ammo Xitoyda shu davrgacha bu qadar keng tarqalmagan edi.

O‘zbekiston Sanitariya-epidemiologiya qo‘mitasining ma’lum qilishicha, Xitoyda avj olgan chikungunya bezgagi O‘zbekistonda tarqalmaydi. Qo‘mitaga ko‘ra, ushbu kasallikni tarqatuvchi chivinlar O‘zbekiston tabiatida uchramaydi.

• Chivin
• Sanitariya
• Virus
• Xitoy