Toshkent irrigatsiya va qishloq xoʻjaligini mexanizatsiyalash muhandislari instituti mustaqil Oʻzbekiston tarixida birinchi marotaba 2020-yil uchun QS’ning Sharqiy Yevropa va Markaziy Osiyo davlatlari universitetlari reytingida qayd etildi.
 

Bu Oliy va oʻrta maxsus taʼlim vazir vazirligining Respublika oliy taʼlim muassasalarini xalqaro nufuzini oshirish maqsadida Times Higher Education va QS kabi dunyoning yetakchi xalqaro agentliklari bilan soʻnggi ikki yil ichida olib borgan hamkorligi natijasidir, deya ta’kidlaydi Oliy va oʻrta maxsus taʼlim vazirligi rasmiy veb sayti. 

Vazirlik tarqatgan xabarga ko‘ra, Toshkent irrigatsiya va qishloq xoʻjaligini mexanizatsiyalashtirish muhandislari instituti QS reytingida akademik soʻrovnoma, ish beruvchilarning bahosi va ilmiy salohiyati kabi mezonlarda Sharqiy Yevropa va Markaziy Osiyo davlatlari universitetlari oʻrtasida ijobiy koʻrsatkichlarni qayd etib, 301-350 oʻrinlar oraligʻidagi universitetlar qatoridan joy oldi.

(Maʼlumot uchun: QS reyting agentligi tomonidan ilmiy tadqiqotlarga 20 foiz, akademik soʻrovnomaga (jahon OTMlariga oʻrganilayotgan universitet yuzasidan soʻrovnoma yuborish, jahon OTMlari uchun tanilishda ilmiy tadqiqot ishlarining roli yuqori) 30 foiz, ish beruvchilar soʻrovnomasiga 20 foiz, oʻquv jarayoniga 15 foiz, boshqalarga 15 foiz ajratilgan.)

Ushbu reytingda 1-oʻrinni Lomonosov nomidagi Moskva davlat universiteti, 2-oʻrinni Sankt-Peterburg davlat universitetlari egalladi. Reytingdan Rossiya, Chexiya, Turkiya, Vengriya, Polsha, Ruminiya, Sloveniya, Xorvatiya, Belorus, Bolgariya kabi davlatlarning yetakchi universitetlari joy oldi.

Hozirda vazirlik tomonidan xalqaro ekspertlar bilan birgalikda respublikamizning yetakchi oliy taʼlim muassasalarini bosqichma-bosqich xalqaro reytingga kiritishga tayyorlash boʻyicha ishlar olib borilmoqda.

Xorijiy ekspertlar tomonidan respublikaning 10 ta oliy taʼlim muassasasi (OʻzMU, TIQXMMI, TDTU, TATU, SamDU, TDAU, UrDU, TTA, Turin politexnika universiteti, QQDU) tanlab olindi va ularning Times Higher Education va QS bazasida tegishli profillari yaratildi. Ekspertlar shu 10 ta oliy taʼlim muassasasi bilan yaqindan ishlamoqda.