5 ta chiroyli va sodda xonaki gul – ular alohida parvarishga muhtoj emas, goh-gohida qarab qo‘ysangiz, shuning o‘zi yetarli, xursand bo‘lib o‘saveradi. 

Uy sharoitida o‘sadigan gullarning parvarishi faqat suv quyish bilan cheklanmaydi: ularga qay darajada yorug‘lik kerakligi, havo harorati va namligi qanday bo‘lishi lozimligini, o‘g‘itlarning qaysi turi to‘g‘ri kelishini bilish zarur. Ammo gullarni sevuvchi, ularni xonadonlarida gurkirab turishini istovchilarning hammasi ham birdek bu masala bilan shug‘ullanavermaydi. Bunga har xil sabablar bo‘lishi mumkin. Mutaxassislar esa ana shunday insonlarga unchalik e’tibor talab qilmaydigan xonaki gullar haqida ma’lumot berishgan. Bu gullar juda kam vaqtingizni oladi, quruq havoda ham o‘saveradi, o‘g‘it ham, boshqa gultuvakka o‘tqazishni ham talab qilmaydi. Goh-gohida sug‘orib turilsa, yetadi.   

Sanseviyeriya  

Bu o‘simlikni ko‘plar “cho‘rtan dumi”, deb ham ataydi. Bu gul yaproqlarining hajmi va shakli turlicha. Agar o‘ziga mos keluvchi gultuvak tanlay olsangiz, bolaligingizdagi poliklinikalarni ham eslatadi. Uni, ayniqsa, qishda juda kam sug‘orish kerak. Mo‘l-ko‘l yorug‘likka ham talabgor emas. Shuning uchun xonaning sizga ma’qul kelgan qismida yashnab turaveradi. 
   
Sukkulentlar  

Keyingi paytlarda sukkulentlar ancha mashhurlashib boryapti. Ular juda ham chiroyli, turli-tuman va alohida parvarishga muhtoj emas. Tuproqsiz ham o‘saveradi. Qishda oyiga bir marta suv quyilsa, yetadi. Gultuvaklari ham chuqur bo‘lishi shart emas. 
  
Maranta 

Tabiatan ajoyib suratlar chizilgan yirik yaproqli bu o‘simlik qorong‘uroq xonada ham yashnab turaveradi. Unga sukkulentlarga qaraganda nisbatan ko‘proq suv quyib turish kerak. Agar xonada namlik yetarli bo‘lsa, qish oylarida unchalik suv talab qilmaydi. 
 
Nefrolepis 

Rang-barang paporotniklarning bir turi. Uy sharoitlariga moslashadi va havoni yaxshi tozalaydi. Uni yorug‘lik ko‘p, biroq quyosh nurlari bevosita tushmaydigan joyda, shuningdek, isitish moslamalaridan uzoqroqda saqlash kerak. Yozda balkonga chiqarib qo‘ysa ham bo‘ladi. Juda kam suv ichadi. 
  
Molochay 

Bu o‘simliklar turi kaktuslarga o‘xshaydi. Og‘ir sharoitlarda ham o‘saveradi. Biroq juda ham zararsiz emas. U ajratadigan sharbat tarkibida kuydirish xususiyatiga ega bo‘lgan zaharli moddalar mavjud. Agar uyda yosh bolalar bo‘lsa,  uni tanlamagan ma’qul.