Normativ-huquqiy hujjatlar loyihalari muhokamasi portaliga Oʻzbekiston Respublikasi Prezidentining “Respublika suv taʼminoti tizimini yanada takomillashtirilishi munosabati bilan Oʻzbekiston Respublikasi Prezidentining ayrim hujjatlariga oʻzgartirish va qoʻshimchalar kiritish toʻgʻrisida” farmoni loyihasi joylashtirildi.

Unga koʻra, mazkur hujjatga quyidagicha oʻzgarishlar kiritiladi:

“Oʻzsuvtaʼminot” AJ va uning tarkibidagi suv taʼminoti va kanalizatsiya korxonalariga yetkazib berilgan suv taʼminoti va kanalizatsiya xizmatlari uchun qarzdorlikni isteʼmolchilar – yuridik shaxslar va yakka tartibdagi tadbirkorlarning bank hisobraqamlaridan soʻzsiz undirish haqida bajarilishi majburiy boʻlgan inkasso topshiriqnomalari qoʻyish huquqi beriladi;

2020-yil 1-fevralga qadar muddatda Oʻzbekiston Respublikasi Markaziy banki bilan birgalikda tushumlarning haqqoniy hisobini yuritish va pul mablagʻlarining harakatini “Oʻzsuvtaʼminot” AJ tomonidan monitoring qilishni taʼminlovchi, suv taʼminoti va kanalizatsiya xizmatidan tushgan mablagʻlarni yagona bank hisobraqamlarida jamlash tizimi joriy etiladi.