58 yoshli neft sarmoyadori Richard Gibson — dunyodagi eng g‘alati kolleksiyalardan birining egasi. So‘nggi 36 yil davomida u olgan hamma oyoq tirnoqlarini shisha bankada yiqqan. 

Tirnoq yig‘ish ancha g‘alati xobbi, lekin Richardning aytishicha, u tirnoq yig‘ishni rejalashtirmagan, shunchaki qiziqish tufayli tirnoqlarini qoldirishni boshlagan, keyin bu ishdan o‘zini to‘xtatolmagan. 

1987 yil fevralda Richard oyoq barmoqlarining tirnoqlarini olgan va tashlab yuborish o‘rniga manikyur qutisiga solib qo‘ygan. Keyin qutini to‘ldirishga qancha vaqt ketishin bilish niyatida har gal tirnoqlarini o‘sha yerga solishni boshlagan. Bunga ko‘p vaqt ketmadi — atigi ikki yil, bu paytga kelib u jarayonga berilib ketgandi. Shuning uchun kolleksiyasini katta shisha bankaga joylashtirdi. Tirnoqlarini hozir ham o‘sha yerga soladi. 

“U yerda qancha tirnoq borligini bilmayman, — deb tan oladi Gibson. — Hisob allaqachon mingdan oshgan”. Ammo shunda ham uning bankasi 99 foizga to‘lgan. Gibson banka to‘lganidan keyin nima qilishini bilmaydi. “Yana boshqa joyga ko‘chirsam kerak. Lekin hozircha yana bir necha oy tirnoq olishimga yetadi”.  

Bankadagi tirnoqlar juda uzun. Gibsonning aytishicha, muntazam olib yurmagani uchun tirnoqlari o‘sib ketar ekan. “Faqat sinishni boshlaganda, tirnoqlarimni olaman”. 

Bunaqa kolleksiyani yig‘ish oson bo‘lmagan. Richard bankani sobiq xotinidan va mehmonlardan yashirishga majbur bo‘lgan, hech narsaga qaramay, uni ehtiyotlab asrashgagina emas, doim to‘ldirib borishga muvaffaq bo‘ldi. Yaqinda uning tirnoqlari haqida “Hayratga soluvchi haqiqat” kitobida ham yozishdi.  

Gibson sobiq xotiniga bu quvonchli xabarni hali ma'lum qilmadi. “Unga kitobning o‘zini ko‘rsata oladigan vaqtimni kutyapman. Tirnoqlar har doim uning asabiga tekkan, — deydi Richard. — Shaxsan men uni ayblamayman”.

Lekin tirnoqlar Gibsonning yagona qiziqishi emas. Richard har xil g‘alati faktlarga ham qiziqadi. U Riplining “Ishonaman — ishonmayman” kolonkasiga 70 mingdan ortiq fakt yig‘ib, topshirdi. “Shundan 750 tasi chop etildi, o‘zim esa kitobga tirnoqlarim bilan kirdim, — deydi Gibson. — Bu, albatta, “Oskar” sovrindori bo‘lish emas, lekin men o‘zimdan faxrlanaman”.