Biz sotib oladigan asalni mahalliy “mehnatkash” asalarilar to‘playdi. Yovvoyi asalarilar tomonidan tayyorlangan asal ham mavjud. Ammo buni olish unchalik oson emas.

“Qaysi asal yaxshiroq?” yoki “Qaysi asal foydali?”, degan savolga aniq javob berishning iloji yo‘q. Asal o‘zining turli xil navlari, ta’mi, rangi, tuzilishi va albatta, dorivor xususiyati bilan ajralib turadi. Asalning barcha turlari inson organizmiga turlicha ta’sir qiladi.

Lipa daraxtidan olingan asal

Bu asal lipa (jo‘ka) gullaridan nektar to‘plash orqali olinadi. U och-sariq rangda bo‘lib, vaqt o‘tishi bilan shakarlanadi va oq rangga aylanadi. Bunday asal virusli va bakterial kasalliklarni yo‘q qilishga qodir. Bundan tashqari nafas olish va ovqat hazm qilish tizimidagi kasalliklarni oldini olish va davolash uchun ishlatiladi. Lipa asali yaralarga ijobiy ta’sir ko‘rsatadi. Kuygan joylarni davolashda ham samarali vosita hisoblanadi. 

Grechixa gulidan olingan asal

Bu asal to‘q rangda bo‘lib, nordon ta’m va o‘tkir hidga ega. Ichimliklarga qo‘shilganda u ajoyib hid hosil qiladi. Shuningdek, grechixa asali mikroelementlarga boy hisoblanib, immunitetni oshiradi, oshqozon og‘rig‘iga yordam beradi, bakteriyalarga qarshi kurashadi, yurak qon-tomir tizimi uchun foydali hamda yallig‘lanishni tezda yengadi.

Kungaboqar o‘simligidan olingan asal

Bu asal yorqin sariq rangda bo‘lib, tomoq og‘rig‘i uchun foydali. Nafas olish tizimi kasalliklari bilan samarali kurashadi.

Akatsiya gulidan olingan asal

Bu asal suyuq bo‘lib, shakarlanganda, deyarli oq rangga aylanadi. Suyuqlik o‘z xususiyatini uzoq vaqt ushlab turadi. U yoqimli ta’m va xushbo‘y hidga ega. Bunday asal asab kasalliklarini davolashga yordam beradi, tinchlantiradi, stress va xavotirni yengillashtiradi. Uyquga ketishdan avval akatsiya asalidan choy damlab ichish juda foydali. Buyrak va jigar kasalliklarining oldini olishda ham qo‘llash mumkin.