Poytaxt IIBB matbuot xizmati xabariga ko‘ra, Toshkent shahri Yunusobod tumanida joylashgan mas’uliyati cheklangan jamiyat yerto‘lasidan ichida 50 ming dollar bo‘lgan seyfni o‘g‘irlagan “kuryer” va uning sheriklari ushlandi.

IIO ga kelib tushgan xabar asosida Toshkent shahar IIBB tezkor qidiruv xizmati jinoyat qidiruv boshqarmasi tomonidan jinoyatda gumonlanganlarni aniqlash maqsadida tezkor qidiruv tadbirlari o‘tkazilgan. Natijada mazkur jinoyat tashkilotchisi 1988-yilda tug‘ilgan Bobur ismli shaxs, 2000-yilda tug‘ilgan Sherzod va mazkur MChJda haydovchi lavozimida ishlovchi Abdurahmon ismli shaxs qo‘lga olingan.

Ma’lumotlarga ko‘ra, jinoyat sodir etilishi va pullarning o‘g‘irlanishida mazkur MChJda haydovchi bo‘lib ishlovchi Abdurahmon ismli shaxs yordamlashgan, ya’ni ofisga pullarni o‘g‘irlashga kelgan Sherzodga samokat, buyurtma yetkazuvchilar sumkasi va shlem kaskasini bergan. U esa tunda Yunusobod tumanida joylashgan ofisga borib, yerto‘ladagi ichida 50 ming AQSh dollar puli bo‘lgan seyfni olib, voqea joyidan yashiringan.

Mazkur holat yuzasidan Yunusobod tumani Ichki ishlar organlari faoliyatini muvofiqlashtirish boshqarmasi tergov bo‘limi tomonidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilgan. Mazkur moddaga ko‘ra, sud hukmi bilan 15-yilgacha ozodlikdan mahrum qilish jazosi nazarda tutilgan.

• Jinoyat
• O'g'irlik
• Toshkent
• Yunusobod tumani