Aksariyat insonlar hujjatlar uchun tushgan rasmidan uyaladi. Qaniydi, imkoni bo‘lsa-yu bu suratni hech kimga ko‘rsatishmasa... Hujjat uchun maxsus, rasmiy ko‘rinishda suratga tushish ko‘ringanidek oson ish emas. Shu sababli ko‘pchiligimiz bu kabi suratlarda “chiroyli” ko‘rinib qolamiz. Biroq, bu holatni ham o‘zgartirish mumkin: chiroyli rasmga tushishning imkoni bor. Qachonki...

1. Iyakni juda ko‘tarib yubormang

Rasmga tushayotgan vaqtda suratkashning “boshingizni ko‘taring”, degan gapini deb boshni emas, iyakni juda ko‘tarib yuboramiz. Oqibatda suratda burun teshiklari yaqqol ko‘rinib qoladi. Surat ham notabiiy ko‘rinishda paydo bo‘ladi. Suratdagi odamning iyagi nisbatan semiz va beso‘naqay bo‘lib ko‘rinib qoladi. Yaxshisi, suratda iyakni biroz yuqoriga ko‘tarib, yelkalarni bo‘shashtirib tushing. Boshni esa ko‘tarmang.

2. Boshni ortga ham tashlamang

Boshni juda orqaga tashlash ham xunuk rasmga sabab bo‘ladi. Axir, baqbaqalari bilan odam suratda chiroyli chiqishi mumkinmi? Yuzning pastki qismini yaqqol ko‘rsatish uchun iyakni oldga, boshni esa pastga tushirish kerak.

3. Og‘izni katta ochib tabassum qilmang

Keng ochilgan og‘iz bilan tabassum qilgancha suratga tushish hujjat uchun umuman mos kelmaydi. Chunki bu insonning tabiiy yuz xususiyatlarini buzadi. Yengil tabassum esa aksinsa, hujjatdagi suratga ko‘rk bag‘ishlaydi. Buning uchun og‘iz burchaklarini birozgina ko‘tarish kifoya.

4. Qovog‘ingizni uymang

Qoshlar chimirilgan, qovoqlar uyilgan holatdagi surat chiroyli chiqmasligi aniq. Shu sababli suratga xuddiki nimadandir hayron qolgan holatdagi qiyofa bilan tushish tavsiya etiladi. Bu nigohlaringizni “ochadi”. 

5. Soch turmagiga alohida e’tibor bering

Sochlaringizni tartibli turmaklab, baland turadigan soch turmaklaridan ehtiyot bo‘ling. Shuningdek, peshonangizni to‘sib qo‘yadigan kokillardan ham saqlangan ma’qul. Peshona imkon qadar ochiq bo‘lishi kerak. Sochlar esa ko‘z-qoshingizni to‘smasligi lozim. 

6. Makiyajga e’tibor bering

Yaltiroq bo‘yoqlardan iborat makiyaj har qanday ko‘rinishni buzadi. Negaki, bu kabi bo‘yoqlar kamera “vspishka”si oqibatida yaltirab qoladi yoki sizni yetarlicha qari qilib ko‘rsatadi. Qosh va kipriklar ham yaqqol ko‘zga tashlanib turadigan darajada bo‘yalishi lozim. 
Lab bo‘yog‘i rangiga keladigan bo‘lsak, uning imkon qadar tabiiy lab rangiga mosrog‘ini tanlagan ma’qul. Juda yorqin yoki to‘q rangli lab bo‘yog‘i rasmiy hujjatlar uchun mos kelmaydi.

7. Kiyimni to‘g‘ri tanlang

Hujjat uchun rasmlarda asosiy e’tibor yuzga qaratiladi. Ammo bu o‘rinda libos haqida ham unutib qo‘ymaslik kerak. Katta-katta taqinchoqlar, hajmdor yoqa qiyofangizni bezamasligi aniq. Bir xil rangdagi, to‘q rangli kiyim esa ayni muddao.