AQSh prezidenti Donald Tramp Fors ko‘rfazi nomini o‘zgartirib, uni Arabiston yoki Arab ko‘rfazi deb atashni rejalashtirmoqda. Bu haqda Associated Press xabar bermoqda.

Manbalarga ko‘ra, Tramp may oyida Saudiya Arabistoniga tashrifi davomida tegishli bayonotni beradi. Yaqin Sharqning ko‘plab mamlakatlarida “Arab ko‘rfazi” va “Arabiston ko‘rfazi” atamalari keng qo‘llaniladi. Eron bunday nomlanishga qarshi chiqmoqda. Fors — bu ko‘rfazning an’anaviy geografik nomi bo‘lib, u hozirgi Eron hududida joylashgan qadimgi Fors davlati sharafiga nomlangan.

2017-yilda Tramp birinchi muddati davomida Arab ko‘rfazi nomini ishlatganida janjal kelib chiqqandi. Eronning o‘sha paytdagi prezidenti Hasan Ruhoniy AQSh rahbariga “geografiyani o‘rganish”ni taklif qilgan.

“Trampning do‘stligini eng yuqori narx taklif qilgan odam sotib olishi mumkinligini hamma bilardi. Endi uning geografiyasi ham shunday ekanini bilib oldik”, – degan o‘shanda Eron TIV rahbari Muhammad Javod Zarif.

Uni Arab ko‘rfazi deb qayta nomlashga Misrning sobiq prezidenti Jamol Abdunosir va Iroqning sobiq prezidenti Saddam Husayn harakat qilgan. Ular buni ko‘rfaz barcha arab mamlakatlariga tegishli ekani bilan izohlagan.

• AQSh
• Eron
• Taklif
• Tramp