Ko‘pincha telefon qo‘limizdan sirg‘alib tushib ketadi. Yumshoq yuzaga tushsa-ku mayli, ammo qattiq yerga tushadigan bo‘lsa, butunlay sinib ketmasa ham, hech bo‘lmaganda ekran yuzasi darz ketadi. Ko‘pchiligimiz bunga e’tibor ham bermay telefonimizni ishlatishda davom etamiz. Chunki gadjet ekranini almashtirish qimmatga tushadi. Undan ko‘ra, yangi telefon olgan yaxshi deb, yangi xarid uchun qulay paytni kutib yuramiz. Biroq singan ekranli telefonni ishlatish zararli. Sababi… 

 Sog‘liq uchun zararli

Ekrani buzilgan smartfon sog‘liq uchun zararli bo‘lishi mumkin. Zamonaviy gadjetlar sensorli ekranlar bilan jihozlangan. Mobil qurilma ekrandagi imo-ishoralar va barmoqlar orqali boshqariladi. Buzilgan displey barmog‘ingizni kesishi va shisha parchalari chuqur yara qoldirishi mumkin.

Ko‘rish qobiliyatining yomonlashishiga sabab bo‘ladi

Buzilgan ekran, barmoqlarni kesishdan tashqari, ko‘rish qobiliyatiga ham salbiy ta’sir etadi. Darz ketgan joylar tagidagi yozuvlarni o‘qish uchun ko‘zlar ko‘proq kuch sarflab, zo‘riqadi. Natijada, ko‘z odatdagidan 2-3 baravar tezroq charchaydi. Shuning uchun ekrani buzilgan gadjetdan uzoq vaqt foydalanish ko‘rish qobiliyatiga salbiy ta’sir ko‘rsatishi mumkin.

Gadjet vizual jozibasini yo‘qotadi

Ekrani buzilgan smartfonlarning yaqqol kamchiliklari bu vizual jozibadorlikni yo‘qotishdir. Hatto, ekrani singan telefon qimmatbaho bo‘lsa ham foydalanayotganingizda estetik zavq bermaydi. Bunday smartfonni ikkilamchi bozorda sotish qiyin. Xaridor uning narxini sezilarli darajada pasaytiradi. 

Ichki qismlariga zarar yetadi

Gadjetning barcha muhim tarkibiy qismlari bir-biriga yaqin joylashgan. Texnik tarkibiy qismlariga jiddiy shikast yetmasligi uchun ular metall, plastmassa va shishadan yasalgan maxsus monolit qutiga o‘rnatiladi. 

Displey buzilganda, asosiy plataga tushadigan yuk ko‘payadi, chunki singan shisha unga bosim o‘tkaza boshlaydi. Smartfondan faol foydalanish paytida mobil qurilma ichidagi tarkibiy qismlarning harakati ortadi. Bu protsessorga o‘rnatilgan tebranish dvigatelini, batareyani yoki boshqa tarkibiy qismlarning ortiqcha bosim tufayli ishdan chiqishini keltirib chiqaradi.

Namlik ortadi

Smartfon ekrani shikastlanganda yoriqlar ichida kichik bo‘shliqlar paydo bo‘ladi. Ularga suv kirishi mumkin. Keyin namlik, albatta, mobil qurilmaning barcha muhim qismlari joylashgan metall platalarga, protsessor va xotiraga kiradi.
 
Suv tufayli korroziya jarayoni boshlanishi mumkin – platadagi tarkibiy qismlar zanglashni boshlaydi. Qisqa tutashuv ehtimoli katta bo‘ladi. Shuning uchun smartfonning asosiy qismlari tezda ishdan chiqadi.

Displeyni almashtirishning imkoni bo‘lmasa, nima qilishim kerak?

Buzilgan ekranni almashtirishning imkoni bo‘lmasa, parchalanishni kuchaytirmaslik uchun qurilmani ehtiyot qilish kerak. Ekranga plyonkali yoki shishali himoya vositasi o‘rnatish mumkin. Bu gadjetning texnik bazasini himoya qilib, barmoqlaringizga zarar yetishidan saqlaydi va telefonga namlik tushmaydi. Agar ekrandagi yoriqlar haddan tashqari ko‘p bo‘lsa, telefoningizni maxsus g‘iloflarga solib ishlatganingiz ma’qul.