Таҳририятга навбатдаги мурожаат Самарқанд вилояти Тайлоқ туманидан келиб тушди.

Унда жорий йил 18 март куни “Туман газ таъминоти” биносида содир бўлган газ-ҳаво аралашмаси портлаши ҳодисасини “Райгаз” мансабдорлари “босди-босди” қилмоқчи бўлаётгани айтилади.

Ҳодисадан 4 нафар фуқаро,  2 нафар истеъмолчи ва 2 нафар ходим жабрланган. Улар айни пайтда туман марказий шифохонаси Тез тиббий ёрдам бўлимида қолмоқда.

Энг қизиғи, бу ҳақда на ФВВ, на “Ҳудудгазтаъминот” ва на тегишли бошқа ташкилотлар расмий манбаларида хабар берилмаган. Худди “ёпиғлиқ қозоннинг ёпиқлигича қолиши”дан улар ҳам манфаатдордек.

Мурожаатчининг билдиришича, ҳодисадан икки нафар қариндоши – 24 ва 30 ёшли йигитлар ҳам жабрланган. Улардан бирига баданининг 30 фоиз, иккинчисига эса 50 фоиз куйиши ташхиси қўйилган.

Таҳририятга маълум бўлишича, ушбу жабрланувчилар газдан қарздорлиги бўйича тўлов қилиш учун 18 март куни “Туман газ таъминоти” биносига борган ва ҳодиса жабрланувчисига айланиб қолишган.

Уларнинг кейинчалик гувоҳлик беришича, ўша пайтда улар бино ичида газ ҳидини сезишган.

Ушбу воқеадан сўнг жабрланувчилар шифохонага етказилган ва “Райгаз” раҳбарияти улардан ҳеч қаерга шикоят қилмасликларини, ташкилот уларнинг дори-дармонлари учун ёрдам беришини айтади. Аммо орадан 4 кун ўтса ҳамки, ҳеч ким уларнинг ҳолидан хабар олмайди.

Ёнғин чиққан бино эса гуёки ҳеч нарса бўлмагандай қайта таъмирлаб қўйилади.

Шу ерда ҳақли савол туғилади: бинонинг техник хавфсизлиги учун жавобгар бўлганларнинг айбини беркитиш инсон ҳаётидан азизроқми? Ўз ишига масъулиятсиз муносабатда бўлиши 4 инсон тақдирини ўзгартириб юбориши жиноят саналиши керак бўлган бир ҳолатда масъулларнинг ишни “ёпди-ёпди” қилишга уриниши нима деб аталади?

Катта бир ташкилот биноси ёниб кетади, жабрланганлар бўлади ва бу шифохона қабулхонасидаги қайдномада акс этади, аммо ҳодисани на ИИБ ва на прокуратура назоратга олади, шундайми?

Xabardor.uz таҳририяти “Ҳудудгазтаъминот” АЖ, ФВВ ҳамда прокуратура органларидан мазкур ҳолат юзасидан ўрганиш олиб боришларини ҳамда айбдорларга нисбатан тегишлича чора кўришларини сўраб қолади.

• ФВВ
• Газ
• Ҳудудгазтаъминот
• Самарқанд
• tez_yordam
• ёнғин