Давлат чегарасини қўриқлаш бўйича ўтказилган тезкор тадбирлар давомида Фарғона вилоятида катта миқдордаги наркотик моддалар аниқланди.

Маълум бўлишича, Сирдарё дарёсининг Бешариқ тумани ҳудудидан ўтувчи қирғоғида номаълум шахслар томонидан ташлаб кетилган 4 та полиэтилен қоп топилган.

Қоплар кўздан кечирилганда, уларда жами 47 кг 113 грамм “гашиш”, 7 кг 779 грамм “опий” ҳамда кўп миқдорда дори воситалари борлиги аниқланган. Хусусан, 10 710 дона “Лидаза” ва 756 дона “Теноксикам” препаратлари мусодара қилинган.

Дастлабки маълумотларга кўра, ушбу моддалар қўшни давлатдан контрабанда йўли билан олиб кирилган.

Ҳолат юзасидан Жиноят кодексининг контрабанда моддалари асосида жиноят иши қўзғатилиб, тергов ҳаракатлари олиб борилмоқда.

Ҳозирда ҳуқуқ-тартибот органлари томонидан ушбу ноқонуний юк эгаларини аниқлаш бўйича тезкор чоралар кўрилмоқда.

• ДХХ
• Фарғона