Россиянинг Владикавказ шаҳрида 17 апрель куни чиқинди контейнерларини юклаш жараёнида юз берган портлаш оқибатида 46 ёшли Ўзбекистон фуқароси воқеа жойида ҳалок бўлди. Портлаш Владикавказдаги Интернациональная кўчаси ва Партизанский тор кўчаси кесишган ҳудудда содир бўлган. Марҳумнинг ҳамкасблари унинг беш нафар фарзанди борлигини маълум қилган.

Ҳозирда воқеа жойида тезкор хизматлар ва ҳуқуқни муҳофаза қилувчи органлар ишламоқда. Ҳодисанинг барча тафсилотлари аниқланмоқда. Россия тергов органлари томонидан Жиноят кодексининг 109-моддаси 1-қисми (эҳтиётсизлик оқибатида ўлимга сабаб бўлиш) бўйича жиноят иши қўзғатилган.

Дастлабки маълумотларга кўра, портлаш чиқинди контейнерида бўлган портловчи хавфли буюмлар сабаб юзага келган бўлиши мумкин. Сапёрлар томонидан чиқинди ташувчи транспорт воситаси текширилиб, кейинчалик махсус полигонга олиб чиқилиши режалаштирилган.

Шимолий Осетия — Алания республикаси раҳбари Сергей Меняйло аҳолидан ёнғинга хавфли буюмларни чиқинди контейнерларига ташламасликни, уларни махсус хизматлар орқали топширишни сўраган.