Мактабгача ва мактаб таълими вазирлигининг жорий йил 14 апрелдаги кўрсатма хатига мувофиқ, 9- ва 11-синф ўқувчилари учун якуний давлат аттестацияси имтиҳонлари ўтказилиш саналари ҳамда фанлар рўйхати тасдиқланди.

Унга кўра, 9-синф ўқувчилари она тили ва адабиёт (ёки давлат тили) фанидан 1 июнь куни, математика фанидан 4 июнь куни, Ўзбекистон тарихи фанидан эса 8 июнь куни имтиҳон топширади. Жисмоний тарбия фанидан синовлар 1–6 май кунлари амалий шаклда ўтказилади.

11-синф ўқувчилари учун эса она тили ва адабиёт (ёки давлат тили) фанидан имтиҳон 2 июнь куни, математика фанидан 5 июнь куни ҳамда Ўзбекистон тарихи фанидан 9 июнь куни бўлиб ўтади.

Шунингдек, 11-синф битирувчилари учун танлов фанлари ҳам мажбурий ҳисобланади. Улар она тили ва адабиёти (қорақалпоқ, рус, қозоқ, қирғиз, тожик, туркман тиллари), физика, кимё, биология, география, давлат ҳуқуқ асослари ҳамда чет тили фанларидан имтиҳон топширади. Мазкур имтиҳонлар 12 июнь ва 15 июнь кунлари ўтказилади.