АҚШ президенти Дональд Трамп Эрон билан боғлиқ ҳарбий операция яқин орада якунланиши мумкинлигини маълум қилди.

У журналистларга берган баёнотида можаро тез ривожланаётганини таъкидлаб, “Биз истаган натижага эришишимиз мумкин. Бу тез орада тугаши керак”, деди.

Шунингдек, Трамп Эрондаги ҳарбий кампанияни мажбурий қадам сифатида баҳолаб, уни “кичик сафар” деб атади. Унинг сўзларига кўра, АҚШ Эроннинг ядровий қуролга эга бўлишига йўл қўймаслик учун бу ҳаракатларга мажбур бўлган.

Аввалроқ, 12-апрель куни Исламабад шаҳрида АҚШ ва Эрон ўртасида музокаралар ўтказилган. Томонлар қатор масалаларда келишувга эришган бўлса-да, ядровий дастур ва Ҳормўз бўғози орқали кема қатнови масалалари очиқ қолган.

АҚШ томони яқин кунларда янги музокаралар босқичи бошланиши мумкинлигини билдирган.