Жорий йил 19 май кунги Ҳукумат қарорига кўра, 2022/2023 ўқув йилидан давлат мактабларида ўқувчилар учун мактаб формаси тўлиқ жорий этилади (илгари 2024/2025 ўқув йилидан бошлаб жорий этилиши керак эди).

Қайд этилишича, 2022 йил 1 июнгача ҳудудлар кесимида 2022/2023 ўқув йилида мактаб формаларига эҳтиёж аниқланади.

Кам таъминланган оилалар фарзандлари учун мактаб формаси маҳаллий бюджет ҳамда “Темир дафтар”, “Аёллар дафтари” ва “Ёшлар дафтари” жамғармалари маблағлари ҳисобидан сотиб олинишида кўмаклашилади.

Шунингдек, 2022 йил 10 августдан ҳар бир туман (шаҳар)да мактаб формаси ишлаб чиқувчиларнинг  савдо шохобчалари ташкил этилади.

Эслатиб ўтамиз, ягона мактаб формасини жорий этиш тўғрисидаги таклиф дастлаб 2017 йилда президент Шавкат Мирзиёев томонидан илгари сурилган ва орадан бир йил ўтиб, ҳукумат қарори билан мактаб формалари намуналари тасдиқланиб, 2019/2020 ўқув йилидан мажбурий жорий этилиши белгиланган эди.

Бироқ ўша йилнинг май ойида президентнинг қизи, ўша пайтда Президент Администрацияси ҳузуридаги Ахборот ва оммавий коммуникациялар агентлиги директори ўринбосари сифатида ишлаган Саида Мирзиёева мажбурий ягона мактаб формасини жорий этишдан аввал мактаблардаги камчиликларни бартараф этиш лозимлигини таъкидлаган ва 2019 йилнинг 11 июнига келиб, собиқ халқ таълими вазири Шерзод Шерматов мактаб ўқувчиларининг мажбурий формасига ўтиши масаласининг кечиктирилиши ҳақида маълум қилган эди.

• Ҳукумат
• Мактаб
• Мирзиёева
• Қарор
• Шерматов