Мопед ва скутер бошқариш учун ҳайдовчилик гувоҳномаси талаб қилина бошлайди

Ўзбекистонда 1 октябрдан мопед ва скутер ҳайдаш учун авторақам ва ҳайдовчилик гувоҳномасини талаб қилувчи қонун кучга киради. Илгари жорий йил 1 мартдан мопед ва скутер бошқариш учун тегишли тоифадаги ҳайдовчилик гувоҳномаси талаб қилиниши белгиланган эди.

Вазирлар Маҳкамасининг 2024 йил 8 июль (Фойдаланишда бўлган мопед ва скутерларни давлат рўйхатидан ўтказиш тартиби тўғрисидаги вақтинчалик низомни тасдиқлаш ҳақида) ва 9 августдаги (Ёшларни хорижий тилларга ўқитиш тизими такомиллаштирилиши муносабати билан Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида) қарорлари билан 1 мартдан мопед ва скутерларга янги талаблар жорий этилиши режалаштирилган эди.

Уларда мажбурий давлат рўйхатидан ўтиш, давлат рақами белгиларини олиш ва уларни бошқариш учун “А” тоифали ҳайдовчилик гувоҳномасига эга бўлиш белгиланган.

Ўзбекистонда чиройли рақамларни аукционда сотиш бекор қилинади

2025 йил 1 октябрдан бошлаб Ўзбекистон республика товар-хомашё биржаси чиройли давлат рақами белгиларининг аукцион савдоларини тўхтатади. Танланган рақам ягона оширилган тўлов эвазига берилади, унинг миқдори “Узавтомотобелги” давлат унитар корхонаси томонидан белгиланади. Бу ҳақда Вазирлар Маҳкамасининг жорий йилнинг 4 сентябрь куни қабул қилинган “Автомототранспорт воситалари учун рўйхатдан ўтказиш давлат рақами белгиларини бериш тартибини соддалаштириш чора-тадбирлари тўғрисида”ги қарорида сўз боради.

2026 йил 1 январдан бошлаб Ўзбекистонда транспорт воситалари учун чиройли давлат рақами белгиларини аукцион орқали оширилган ставкаларда бериш тартиби бекор қилинади.

Янги тартибга кўра, 2026 йил 1 январдан бошлаб жисмоний ва юридик шахслар тўғридан-тўғри электрон мурожаат асосида онлайн режимда узлуксиз равишда янгиланиб турадиган ягона очиқ маълумотлар базасида бўш турган исталган ҳарф ва рақамлар комбинациясига эга бўлган давлат рақами белгиларини танлаб олиши мумкин бўлади.

Ушбу базадан ИИВ рўйхатдан ўтказиш бўлинмаларида жойлашган инфокиосклар, Йўл ҳаракати хавфсизлиги хизматининг мобил иловаси, ЙҲХХ расмий веб-сайти ва Ягона интерактив давлат хизматлари портали каби ахборот тизимлари орқали фойдаланиш мумкин.

“Ҳар бир маҳаллада футбол майдони” дастури жорий этилади

2025 йил 1 октябрдан бошлаб маҳаллаларда футбол майдонларини барпо этиш бўйича “Ҳар бир маҳаллада футбол майдони” дастури жорий этилади. Бу ҳақда Президентнинг жорий йилнинг 21 август куни қабул қилинган “Ўзбекистонда футбол соҳасини рақамлаштириш ва оммавийлигини янада ошириш чора-тадбирлари тўғрисида”ги қарорида сўз боради.

Унга кўра, ушбу дастур доирасида:

– маҳаллалардаги бўш турган давлат мулки объектлари (ер участкалари) – уларнинг бир қисмида футбол майдони барпо этиш ва камида 10 йил мобайнида унинг фойдаланиш мақсадини ўзгартирмаслик шарти билан электрон онлайн аукцион савдоларига чиқарилади;

– электрон онлайн аукцион савдолари ғолибларига харид қилинган бўш турган давлат мулки объекти (ер участкаси)нинг қолган қисмидан қонунчиликда белгиланган тартибда фойдаланиш ва тасарруф этиш ҳуқуқи берилади;

– электрон онлайн аукцион савдоларига чиқарилган давлат мулки объектлари (ер участкалари) уч ой давомида сотилмаган тақдирда, уларнинг бошланғич баҳоси босқичма-босқич 10 фоиздан, лекин кўпи билан 50 фоизгача пасайтирилган ҳолда ва сотиб олиш тўловларини уч йилгача бўлиб-бўлиб тўлаш шарти билан савдоларга чиқарилади.

Давлат мулки объекти бўлган футбол стадионлари ва майдонларининг фойдаланиш мақсадларини ўзгартириш ва сотувга чиқариш тақиқланади.

Одил судлов академияси ташкил этилади

2025 йил 21 августда Президентнинг “Одил судлов соҳасида юқори малакали кадрлар тайёрлаш тизимини тубдан такомиллаштириш чора-тадбирлари тўғрисида”ги фармон қабул қилинганди. Унда Судьялар олий кенгаши ҳузуридаги Судьялар олий мактаби негизида Одил судлов академияси ташкил этиш белгиланган.

Фармонга кўра, 2025 йил 1 октябрдан:

– судьялик лавозимларига номзодларни тайёрлаш академиянинг 6 ойлик касбий қайта тайёрлаш курсларида давлат гранти асосида ташкил этилади;

– курсларга қабул қилинган шахслар уларнинг эгаллаган лавозими бутун ўқиш даври мобайнида сақланади;

– ўқиш даврида тингловчиларга судья ёрдамчисининг 1 ойлик меҳнатига ҳақ тўлаш фонди миқдорида ҳар ойда стипендия тўланади;

– курсга қабул қилиш психология, чет тиллари, суд ихтисослиги бўйича тест синовлари, ёзма имтиҳон, якка тартибдаги суҳбатдан иборат танлов асосида амалга оширилади.

Якуний аттестация имтиҳони натижаларига кўра, курсни тамомлаган битирувчилар аризасига асосан бўш судьялик лавозимларига ўтказиладиган танловларда иштирок этади.

Ўқиш дастурини ўзлаштирмаган ва якуний аттестация имтиҳонидан ўтмаган тингловчилар, бўш судьялик лавозимига 3 йилгача муддатда ариза топширмаган ёки таклиф этилган судьялик лавозимини эгаллашни рад этган битирувчилар олинган стипендия суммасини тўлиқ миқдорда қайтариши керак.

Товарларни божхонада расмийлаштириш – “Ягона дарча” орқали

Товарларни олиб кириш, олиб чиқиш ва транзит ўтказишга тегишли барча сертификат, хулоса ва рухсат ҳужжатлари фақат “Ягона дарча” божхона ахборот тизими орқали расмийлаштирилади.

Субсидиялар, грантлар ижтимоий карта орқали берилади

Камбағалликни қисқартириш давлат мақсадли жамғармаси маблағлари ҳисобидан фуқароларга пул шаклида бериладиган субсидия, грант ва ссудалар босқичма-босқич ижтимоий карта орқали тақдим этилади.

“Яшил сертификат”га эга бўлиши мажбурий ҳисобланади

Атроф-муҳитга таъсир кўрсатишнинг I ва II тоифаларига мансуб фаолият турлари технологик жараёнлари амалдаги “Яшил сертификат”га эга бўлиши керак.

Амалдаги “Яшил сертификат”нинг мавжудлиги Ўзбекистонда ишлаб чиқарилган, техник тартибга солиш соҳасидаги норматив ҳужжатлар талабларига мувофиқлиги мажбурий тасдиқланиши лозим бўлган маҳсулотга мувофиқлик сертификати бериш учун мажбурий ҳисобланади.

2026 йил июлгача технологик жараёнларни экологик сертификатлаштириш ҳақида шартнома тузган хўжалик субъектлари учун сертификатлаштириш ишлари бепул амалга оширилади.

• Аукцион
• Гувоҳнома
• Ўзбекистон
• Скутер
• Янгилик