Қорақалпоғистонда Султон Увайс тоғ тизмалари ҳудудида 75 миллион йил аввал яшаб ўтган динозавр суяклари топилди. Бу ҳақда “Ўзбекистон 24” телеканалида хабар берилди.

Қайд этилишича, мазкур топилма Бердақ номидаги Қорақалпоқ Давлат университети олимлари ҳамда Ўзбекистон Давлат геология музейи вакилларининг қўшма изланишлари натижасида аниқланган.

Давлат геология музейи директори Аҳмаджон Аҳмадшаевнинг сўзларига кўра, ушбу динозавр Ўзбекистон ҳудудида Бўр даврида — 100−65 миллион йил аввал яшаб ўтган. Унинг умуртқа суяги, илик суяги ва катта болдир суяги аниқланган.

“Бўр даврида Ўзбекистон ҳудудида денгиз бўлган жойлар бор, қуруқ бўлган жойлар бор. Шу жойларда динозаврларнинг юрган излари, суяклари чиқиб келиши бу фанга ҳам, умуман аҳолига ҳам қизиқарли. Айниқса, ҳозир туризмни ривожлантириш учун музейлар керак, шунақа объектлар керак”, – дейди Аҳмадшаев.

Ҳозирда ҳудудда топилган суяк қолдиқларининг қайси турга мансублигини аниқлаш бўйича изланишлар давом этмоқда. Тадқиқот якунлангач, топилмалар Давлат геология музейига топширилади.

• Dinozavr
• Қорақалпоғистон
• топилма