“Солиқ ва бюджет сиёсатининг 2023 йилга мўлжалланган асосий йўналишлари қабул қилингани муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонуни Президент томонидан имзоланди.

Унга кўра, 2023 йил 1 январдан бошлаб:

Қўшимча қиймат солиғи (ҚҚС) ставкаси 15 фоиздан 12 фоизга туширилади (бунда солиқ ставкасининг 3 фоиз пунктга пасайтирилиши натижасида тадбиркорлар ихтиёрида 14 трлн. сўм маблағ қолиши мумкин).

Жисмоний шахслар ўз даромадларини ипотека кредитларини қоплашга йўналтирганда солиққа тортилмайдиган даромадлар миқдори амалдаги йиллик 15 млн сўмдан 73,6 млн сўмгача оширилади;

Бунда, уй-жойнинг қийматига қўйилган талаб (300 млн сўм) бекор қилинади.

Бундан ташқари, солиқ қарзини мол-мулк ҳисобидан ундиришга қаратишнинг белгиланган муддати 60 кунгача (амалда 30 кун) узайтирилади;

Кичик ва ўрта бизнес тоифасига кирувчи тадбиркорлар учун солиқ тўловларини 6 ойга фоизсиз бўлиб-бўлиб тўлаш ҳуқуқи берилади;

Амалда Марказий банк асосий ставкаси (15 фоиз) асосида фоизлар ҳисобланади.

Аввалроқ, ушбу қонуннинг Олий Мажлис Қонунчилик палатасидаги муҳокамасидан сўнг адвокатлик тузилмаларини қўшимча қиймат солиғи тўловчиларига айлантирмаслик қарорига келинган эди.

• ҚҚС
• Қонун
• Солиқ
• Тадбиркорлик