Ҳукуматнинг мутахассислиги бўйича камида беш йил меҳнат стажига эга бўлган хотин-қизларни олий таълим муассасаларига тўлов-контракт асосида ўқишга қабул қилиш тартибини тасдиқлаш ҳақидага қарори лойиҳаси эълон қилинди.

Унга кўра, ўқишга қабул қилиш Оила ва хотин-қизлар давлат қўмитасининг тавсияномаси асосида мутахассислиги бўйича камида беш йил меҳнат стажига эга бўлган хотин-қизлар ҳисобидан, кейинчалик ушбу тизимда беш йил ишлаб бериш шарти билан иш фаолиятига мос бўлган бакалавриат таълим йўналишларига тест синовлари натижаларига асосан амалга оширилади.

Мазкур тартиб олий ҳарбий ва ҳарбийлаштирилган таълим муассасаларига, Ўзбекистонда фаолият олиб бораётган хорижий ва нодавлат олий таълим ташкилотлари ҳамда уларнинг филиалларига нисбатан татбиқ этилмайди.

Тавсиянома мутахассислиги бўйича камида беш йил меҳнат стажига эга, лекин олий маълумотга эга бўлмаган хотин-қизлар учун берилади.

тавсиянома олиш учун талабгор хотин-қизлар доимий яшаш ёки вақтинча рўйхатда турган жойидаги туман (шаҳар) оила ва хотин-қизлар бўлимларига электрон шаклда ҳар йили 1 майдан 1 июнга қадар мурожаат қилади.

Тавсиянома Қўмитанинг биринчи раҳбари томонидан, биринчи раҳбар лавозими вакант бўлганда ёки унинг вазифаларини бажариш бошқа шахсга юклатилганда эса – ушбу раҳбар томонидан берилади.

Хотин-қизларга тавсиянома Қўмита томонидан бир марта берилади ҳамда тавсиянома берилган кундан бошлаб 3 йил муддатга амал қилади.

Маълумот учун, тавсиянома олиш мақсадида мурожаат этиш учун ариза шакли Қўмита томонидан ишлаб чиқилади.

• ОТМ
• Қўмита
• Xotin-qizlar
• Янгилик
• хабар