Ўзбекистонда хизмат кўрсатган артист, таниқли актриса Доно Бобохонова 80 ёшида вафот этди. У миллий саҳна санъати ривожига улкан ҳисса қўшиб, бетакрор образлари билан томошабинлар қалбидан жой олган эди.

Актриса 1946 йил 20 ноябрда Қозоғистонда таваллуд топган. Тошкент театр ва рассомлик институтини тамомлаб, ижодий фаолиятини “Ёш гвардиячилар” театрида бошлаган. 1996 йилда унга “Ўзбекистон Республикасида хизмат кўрсатган артист” фахрий унвони берилган.

У нафақат театрда, балки кино санъатида ҳам ёрқин роллари билан танилган. Жумладан, “Бозор кўрмаган йигит” фильмида она, “Аразласанг, ўламан”да қайнона, “Чол ва набира”да Собира, “Тилим қурсин”да совчи каби образларни маҳорат билан ижро этган.

Доно Бобохонова катта оила эгаси бўлиб, тўққиз набира ва тўрт эваранинг меҳрибон бувиси эди. Унинг ижодий мероси ўзбек санъатида муҳим ўрин тутади.