“Қўшма Штатлар разведкаси ҳозирча Россиянинг эҳтимолий нишонларини аниқламаган, бироқ манбалар Москва Украинадаги фуқаролик объектларига қарши дрон ҳужумларини кучайтириши, энергетика инфраструктурасига зарбалар бериши ёки ўрта масофали ракеталарни учириши мумкинлигини тахмин қилмоқда”, – деб ёзади The New York Times.

Газета билан суҳбатлашган расмийлар, шунингдек, Киев нима сабабдан “Ўргимчак тўри” операцияси ҳақида Вашингтонни олдиндан хабардор қилмаганига оид эҳтимолий сабабларни ҳам келтириб ўтган.

Уларга кўра, Қўшма Штатларнинг Яман ҳусийларига қарши ҳужумлари ҳақида Signal мессенжери чатида юз берган маълумот сизиб чиқиши АҚШнинг операцион хавфсизлигига бўлган ишончни заифлаштирган.

Яна бир сабаб — Россиянинг стратегик бомбардимончи самолётлари бўлиб, улар ядро қуролини ташиши мумкин ва бу АҚШ учун “тақиқланган нишон” ҳисобланади. Украиналиклар эса ўз режаларини ошкор қилмаган, чунки Вашингтон бу режаларга қарши бўлишини билганди.

Европалик расмийлардан бирининг NYT'га айтишича, Украинанинг Россия аэродромларига қилган ҳужуми иттифоқчиларни ўзларининг заиф томонларини қайта баҳолашга мажбур қилган.

“Бу ҳужум АҚШни “Олтин гумбаз” концепциясини ҳам қайта кўриб чиқишга ундаши керак. Чунки Доналд Трамп томонидан илгари сурилган ракеталарга қарши мудофаа режаси ҳозирги шаклида бундай зарбалардан ҳимоя қилишга қодир эмас”, – деб ёзади The New York Times.

• АҚШ
• Россия
• Украина
• Уруш