Ўзбекистон бўйлаб август ойида ёғингарчилик кам кузатилади, ҳарорат эса иқлимий меъёрларга яқин ва нисбатан қулай бўлиши кутилмоқда. Бу ҳақда Гидрометеорология хизмати маркази — “Ўзгидромет” расмий ахборотида маълум қилди.

Қайд этилишича, ой бошида республика ҳудудида қуруқ ва бироз иссиқ ҳаво ҳукм суради. Кундузи ҳарорат асосан +34...+37 даража атрофида сақланади, айрим жанубий ҳудудларда ҳарорат +40...+41 даражагача кўтарилиши мумкин. Бу кўрсаткичлар август ойи учун одатдаги иқлимий даражага яқин ҳисобланади.

Тунги ҳарорат эса ой давомида +18...+23 даража оралиғида бўлиши кутилмоқда. Ойнинг сўнги ўн кунлигида эса ҳаво аста-секин салқинлашиб, кечалари +13...+18 даражагача, кундузи эса +30...+35 даражагача тушиши кутилмоқда. Жанубий вилоятларда ҳарорат +36...+38 даража атрофида сақланиб қолади.

Август ойининг катта қисмида ёғингарчилик кузатилмаслиги эҳтимоли юқори. Республиканинг аксарият ҳудудларида об-ҳаво асосан қуруқ бўлади.

• Об-ҳаво
• Ўзгидромет