Ўзбекистон терма жамоаси ноябрь ойида Уругвай терма жамоасига қарши ўртоқлик учрашуви ўтказади. Бу ҳақда Championat.asia нашри хабар берди.

Нашрга кўра, Темур Кападзе бошчилигидаги миллий жамоа ноябрдаги ФИФА кунларида Уругвайга қарши иккита ўртоқлик учрашуви ўтказади. 1930 ва 1950 йилларда Жаҳон чемпиони бўлган Уругвайга қарши беллашувлардан бири Тошкентда бўлиб ўтиши режалаштирилган. Иккинчи ўйин эса Осиё қитъасида ўтказилиши кўзда тутилмоқда.

Аввалроқ, Уругвай Футбол Федерацияси президенти Игнасио Алонсо 2025 йилнинг ноябрь ойида Уругвай Россияга қарши ўртоқлик учрашуви ўтказилиши мумкинлигини маълум қилган эди:

“Россияга қарши ўйин ноябрь ойида ўтказилиши мумкин. Аммо бу борада якуний қарор қабул қилганимиз йўқ. Олдимизда анча вақт бор, тез орада ўз қароримизни эълон қиламиз”, — деган у.

Маълумот учун, Ўзбекистон миллий жамоаси бугунга қадар Уругвай билан икки бор ўртоқлик учрашуви ўтказган ва ҳар иккисида ҳам йирик (0:3) ҳисобда мағлубиятга учраган.

• Футбол
• Ўртоқлик ўйини
• Ўзбекистон
• терма жамоа
• Уругвай