Маълумотларга кўра, Болгария парламенти кўпчиликнинг овози билан Украинага қўшимча ҳарбий ёрдам, хусусан, таъмирталаб С-300 зенит-ракета комплекслари учун 5В55Р ракеталарини тақдим этишни маъқуллади. Бу ҳақда “Возрождение” сиёсий партияси етакчиси Костадин Костадинов парламент мажлисининг ёпиқ қисми якунлари бўйича “ТАСС”га маълум қилди.

“Мамлакатимиз ушбу ўқ-дориларни мустақил равишда таъмирлаш имкониятига эга эмас ва улардан фойдаланиш Болгария ҳарбий хизматчилари ҳаёти учун жиддий хавф туғдириши мумкин. Болгариядан фарқли ўлароқ, Украина нуқсонлари бўлган бундай ўқ-дориларни ишга тушириш имкониятига эга эканини маълум қилган”, – дейилaди Болгария парламенти мажлисида.

Россиянинг Ҳарбий-техник ҳамкорлик бўйича федерал хизмати Украинага қурол-яроғларни Россиянинг ёзма розилигисиз ўтказиш номақбул эканини билдирди.

“Хусусан, гап Болгария раҳбариятининг Россия томонининг бир неча бор тушунтиришларига қарамай, қурол назорати соҳасидаги халқаро мажбуриятларини қўпол равишда бузишга қаратилган навбатдаги уриниши ҳақида кетмоқда. Украинадаги жанговар зонага қурол-яроғларнинг узатилиши муқаррар равишда можаронинг кучайишига ва бегуноҳ қурбонларга олиб келади”, – дейилади хизмат хабарида.

Россия томони Болгарияни “ҳарбий-техник ҳамкорлик соҳасида халқаро ҳуқуқнинг бузилишига йўл қўймаслик мақсадида қарорни қайта кўриб чиқишга” чақирди.

Россиянинг Украинага кенг кўламли босқини бошланганидан бери Ғарб давлатлари Киевни қурол-яроғ билан қўллаб-қувватламоқда. Россия расмийлари Украинани Ғарб қуроллари билан таъминлаш можаронинг кучайишига олиб келишини айтиб, бундай таъминотни танқид қилмоқда. Шу билан бирга, Кремл Ғарб қуролларининг Киевга топширилиши Москванинг “махсус операция” мақсадларига эришишига тўсқинлик қилмаслигини бир неча бор таъкидлаган.

• Беларусь
• Ҳарбий
• Россия
• Украина