2025/2026-ўқув йили учун абитуриентларни рўйхатга олиш 5 июндан 25 июнгача онлайн тарзда амалга оширилди. Бу давр мобайнида республика бўйича жами 671 397 нафар абитуриент рўйхатдан ўтди. Шундан 426 685 нафари (63,6 %) жорий йил битирувчилари, 244 712 нафари (36,4 %) эса олдинги йиллар битирувчилари ҳисобланади.

Абитуриентларнинг 53,8 фоизини (361 019 нафар) хотин-қизлар, 46,2 фоизини (310 378 нафар) эркаклар ташкил этди.

Алоҳида иқтидор талаб этиладиган йўналишларга 39 307 нафар абитуриент ҳужжат топширди.

Рўйхатдан ўтиш жараёнида тақдим этилган халқаро сертификатлар тизимли равишда кўриб чиқилди. Натижада 18 854 та сертификат ҳақиқий деб топилди ва тан олинди. 3 370 та сертификат эса белгиланган талабга жавоб бермагани сабабли рад этилди.

Жорий йилда барча фанлардан миллий ёки халқаро сертификатга эга бўлган 678 нафар абитуриент тест синовларидан озод қилиниб, бевосита танлов босқичига ўтказилди. 2024 йилда бундай имкониятдан атиги 1 нафар абитуриент фойдаланган эди.

85 140 нафар абитуриент умумтаълим фанларидан, 58 216 нафари эса чет тилларидан миллий ёки халқаро сертификатга эга экани аниқланди. Бу кўрсаткичлар 2024 йилда мос равишда 13 180 ва 44 834 нафарни ташкил этган.

Жорий йилдан бошлаб фанлар мажмуасида чет тили биринчи фан сифатида белгиланган йўналишларга фақат тил сертификатига эга абитуриентлар қабул қилинмоқда. Бу талабларга мос келган абитуриентлар сони 22 041 нафарга етди.

Тест синовларининг очиқ ва шаффоф ўтишини таъминлаш учун 3 мингдан ортиқ жамоатчилик вакиллари гуруҳ назоратчилари сифатида жалб қилинди. Шунингдек, эшитиш ва нутқида нуқсони бўлган абитуриентлар учун 100 нафарга яқин сурдотаржимон иштирок этади.

Тест синовлари 14–23 июль кунлари икки сменада ўтказилади. 65 та катта сиғимли бино танлаб олинган бўлиб, ҳар куни икки сменада 70 140 нафаргача абитуриент тест синовларидан ўтади.

Касбий (ижодий) имтиҳонлар 7 июлдан бошлаб 52 та олий таълим муассасасида ўтказилмоқда. Имтиҳон санаси, вақти ва манзили ҳақидаги маълумотлар абитуриентларнинг my.uzbmb.uz сайтидаги шахсий кабинетларига юборилган. Улардан имтиҳон бошланишидан бир соат олдин белгиланган жойга келиш сўралади.

2025/2026-ўқув йили учун академик лицейларга ҳужжат топшириш 10 июль куни якунланди. Умумтаълим мактабларининг 9-синф битирувчиларидан ҳужжатлар my.edu.uz портали орқали онлайн қабул қилинди. Ҳозиргача 49 мингдан ортиқ ариза қабул қилинган.

Битирувчилар техникумлар қабулига ҳам шу портал орқали бир вақтнинг ўзида рўйхатдан ўтиш имкониятига эга бўлишди. Бу уларнинг альтернатив таълим йўналишини танлашларига шароит яратди. Техникумларга рўйхатдан ўтиш 20 июлгача давом этади. Айни пайтгача 135 мингдан ортиқ абитуриент техникумларга ҳужжат топширган.

Магистратура мутахассисликларига ҳужжат топшириш my.edu.uz платформаси орқали 30 июлгача амалга оширилади. Танловда миллий ёки халқаро тил сертификатига эга бўлганлар иштирок этиши мумкин.

Хорижий олий таълим муассасалари битирувчилари учун дипломлар кеч тақдим этилишини инобатга олган ҳолда, уларга академик маълумотнома ва транскрипт асосида ариза топширишга рухсат берилди.

Ижтимоий ҳимояга муҳтож тоифадаги абитуриентлар, хусусан, кўзи ожизлар учун магистратурага киришда алоҳида тартиб жорий қилинди. Улар учун тил сертификати талаби бекор қилинади. Агар бакалавр дипломидаги ўртача балл 100 баллик тизимда 71 ёки ундан юқори, 5 баллик тизимда эса 4 ёки ундан юқори бўлса, улар қўшимча давлат гранти асосида қабул қилинади.

• Матбуот анжумани
• Сертификат
• Test to‘lovi
• абитуриент