Оқ уй АҚШ ва Россия президентларининг иккинчи учрашувига тайёргарликни тўхтатди. Аввалроқ, Владимир Путин билан саммит яқин икки ҳафта ичида Будапештда ўтказилиши мумкинлигини айтган Доналд Трампнинг сўзларига кўра, у “фойдасиз учрашув”ни истамайди.

АҚШ давлат котиби Марко Рубио ва Россия ташқи ишлар вазири Сергей Лавровнинг президентлар музокараларидан бир неча кун олдин ўтказилиши режалаштирилган учрашуви ҳам амалга ошмайди. Оқ уйнинг таъкидлашича, Рубио ва Лавров 20 октябрь куни “самарали телефон суҳбати” ўтказган, бироқ юзма-юз учрашишдан бош тортган, чунки бунга “зарурат йўқ”.

Путин билан телефон орқали мулоқотдан сўнг унинг фикрини нима ўзгартиргани ва нима учун Трамп Будапештдаги музокаралар вақтни беҳуда сарфлаш бўлишини ўйлаётгани ҳақидаги саволга у шундай жавоб берди: “Мен бундай бўлишини айтмаганман ва биласизми, нима бўлишини ҳеч қачон билмайсиз. Аммо бу фронтда, Украина ва Россия урушида кўплаб воқеалар содир бўлмоқда ва кейинги икки кун ичида биз нима қилаётганимиз ҳақида сизга хабар берамиз”.

Маълумот учун, Америка президенти 17 октябрь куни Оқ уйда Украина президенти Владимир Зеленский билан учрашуви якунлари бўйича фронтни “музлатиш”ни таклиф қилганди. Зеленский Европа давлатлари етакчилари билан биргаликда ташаббусни қўллаб-қувватлаган.

• АҚШ
• Путин
• Россия
• Трамп
• Украина
• Зеленский