Ўзбекистон ва Қозоғистон ўртасидаги дўстлик, стратегик шериклик ҳамда иттифоқчилик муносабатларини янада мустаҳкамлашга қаратилган долзарб масалалар кўриб чиқилди.

Учрашув бошида давлатимиз раҳбари Қозоғистон Президентини янги Конституция бўйича референдум муваффақиятли ўтгани билан табриклади.

Томонлар ҳудудларда мунтазам ўтказилаётган норасмий учрашувлар яхши анъанага айланганини, бу эса икки томонлама ва минтақавий масалаларни очиқ ва конструктив муҳокама қилишга хизмат қилаётганини таъкидлади. Ўтган йил ноябрь ойида Қозоғистон Президентининг Ўзбекистонга ташрифи чоғида эришилган келишувларнинг амалий натижалари ижобий баҳоланди. Бугунги кунда ҳукуматлараро ва парламентлараро алоқалар сезиларли даражада фаоллашган.

Савдо-иқтисодий ҳамкорлик ҳам ўсишда давом этмоқда: ўтган йили товар айирбошлаш ҳажми 5 миллиард долларга етди. Автомобилсозлик, логистика, инфратузилма, электротехника ва қурилиш материаллари йўналишларида қўшма лойиҳалар муваффақиятли амалга оширилмоқда.Шунингдек, кимё, геология, энергетика ва автомобиль саноати учун бутловчи қисмлар ишлаб чиқариш каби соҳаларда янги ташаббуслар муҳокама қилинди.

Транспорт ва логистика масалаларига алоҳида эътибор қаратилиб, чегараолди инфратузилмасини модернизация қилиш, тўсиқларни бартараф этиш ҳамда ташқи бозорларга чиқишни таъминлайдиган самарали транспорт йўлакларини яратиш зарурлиги қайд этилди.

Томонлар йирик минтақавий лойиҳалар, жумладан, “Қамбарота” гидроэлектр станцияси қурилишини жадаллаштириш ҳамда “яшил” энергия экспорти бўйича ташаббусларни илгари суришни ҳам муҳокама қилди.

Бундан ташқари, сув ресурсларидан оқилона фойдаланиш, экологик ташаббусларни ривожлантириш ва чегара ҳудудларда “Тоза ҳаво” лойиҳаларини амалга ошириш масалалари ҳам кун тартибида бўлди.

Етакчилар юқори технологиялар, космик соҳа, рақамлаштириш, электрон тижорат ва стартапларни қўллаб-қувватлаш борасида ҳамкорликни кенгайтиришга тайёр эканликларини билдирди.

Маданий-гуманитар алоқаларни ривожлантириш, жумладан, маданият кунлари, ёшлар форумлари ва туризм соҳасидаги ҳамкорликни кучайтириш бўйича ҳам келишувга эришилди.

Учрашув якунида томонлар ўзаро савдо ҳажмини яқин йилларда 10 миллиард долларга етказиш бўйича аниқ чораларни кўриб чиқди. Ҳукуматларга эса эришилган келишувларни амалга ошириш учун “йўл харитаси” ишлаб чиқиш топширилди.

• Шавкат Мирзиёев