“Замон” информацион дастурида маълум қилинишича, Самарқанддаги мактабда аёл 1-синф ўқувчиларини ургани юзасидан маъмурий баённома расмийлаштирилиб, қонуний қарор қабул қилиш учун суд органларига юборилган. Ҳолат 3 апрель куни Самарқанд вилояти Қўшработ туманида жойлашган 53-умумтаълим мактабида содир бўлган. 1-синф ўқувчилари дарс машғулотлари тугагач, мактабдан уйларига кетаётган вақтида ўзаро низолашган. 6 апрель куни калтак еган ўқувчининг 45 ёшли онаси мактабга келиб, синфда ўқувчилар олдида жанжал кўтариб, ўғлини урган синфдошларини таъқиб этиб, уларни калтаклаган. Ўқитувчининг сўзларига кўра, синфдошлар жанжалидан хабар топгач, болаларнинг ота-оналарини чақиртирган. Ўқитувчининг маълум қилишича, у учала боланинг ота-оналари билан гаплашиб, вазиятни ўрганишган. “Узр сўраймиз, ўғлимиз шунақа қилиб қўйибди”,– деди”, – дея таъкидлади ўқитувчи. Кейин синфга кириб борганида ўғли калтаклаган аёл уларни кутиб турган бўлган. Ўғлини қайси бола урганини сўрагач, жанжал бошланиб кетган.

“Келган вақтимда урган болаларнинг оналари мени кулиб қарши олди. Уларни кўриб менинг жаҳлим чиқди. “Равшан ким?”, дедим. “Тур болам”, – деди Равшаннинг онаси. Мен у болаларни танимайман ҳам. Жаҳлим чиққандан уларни уриб кетдим. Мен онаман. Ўзимни босолмасдан у болажонларни уриб юбордим. Қилган ишимдан афсусдаман. Бундай ҳолат такрорланмаслигини хоҳлайман”, – деган айбдор она.

Мазкур ҳолат юзасидан Қўшработ тумани ички ишлар бўлими томонидан уч нафар вояга етмаган шахснинг ота-оналарига нисбатан Маъмурий жавобгарлик тўғрисидаги кодексининг 47-моддасига (болаларни тарбиялаш ва уларга таълим бериш борасидаги мажбуриятларни бажармаслик) асосан маъмурий баённома расмийлаштирилган. Шунингдек, болаларни урган аёлга нисбатан Маъмурий жавобгарлик тўғрисидаги кодексининг 52-моддасига (енгил тан жароҳати етказиш) асосан маъмурий баённома расмийлаштирилиб, қонуний қарор қабул қилиш учун суд органларига юборилган.

• Болалар
• Мактаб
• Ota-ona
• Самарқанд
• Суд