Бухоро халқаро аэропорти директори ўринбосари Шаҳбоз Ҳайитов “Ўзбекистон 24” телеканалига берган интервьюсида маълум қилишича, Бухорода янги халқаро аэропорт 2027 йил биринчи чорагида ишга туширилиши мумкин.

Унинг сўзларига кўра, ҳозирда аэропортда 550 нафар ходим ишлайди. 2026-йилги режа бўйича авиақатновларни 15 фоизга кўпайтириш, 2026−2027 йилларда янги аэропорт қуриб, ишга тушириш мақсад қилинган. Янги аэропортни 2027-йил биринчи чорагида ишга тушириш режалаштириляпти. У соатига 2000 йўловчига хизмат кўрсатиши кўзда тутилган.

Бухоро вилояти ҳокими ўринбосари Жалол Арашовнинг таъкидлашича, аэропорт бир вақтнинг ўзида соатига 16 тагача ҳаво кемасини қабул қилиш, ҳафтасига 100 дан ортиқ рейсларни амалга ошириш имкониятига эга бўлади.

Эслатиб ўтамиз, Бухоро туманида янги халқаро аэропорт қуриш лойиҳаси 2024 йилнинг май ойида тақдим этилганди. Ўша пайтда лойиҳа қиймати 226 миллион долларга баҳоланиб, Давлат-хусусий шерикчилик асосида амалга оширилиши маълум қилинганди.

• Аэропорт
• Бухоро