Рақобат қўмитаси маълум қилишича, Намангандаги тиббиёт муассасаларида истеъмолчилардан асоссиз ундирилган 300 миллион сўмга яқин маблағларни қайта ҳисоб-китоб қилиш бўйича кўрсатма берилди. Қўмитанинг Наманган вилояти ҳудудий бошқармаси томонидан вилоят ҳудудида фаолият юритаётган Соғлиқни сақлаш вазирлиги тизимидаги Тўрақўрғон, Уйчи, Учқўрғон, Чортоқ ва Янгиқўрғон туман тиббиёт бирлашмаларида тиббиёт учун мўлжалланган ўлчаш ва синаш воситаларининг метрологик кўрикдан ўтказилгани, шунингдек, улардан беморларни кўрикдан ўтказиш жараёнида фойдаланилиши ҳолати юзасидан ўрганиш ишлари олиб борилган. Ўрганишлар натижасида тиббиёт бирлашмалари томонидан фойдаланилаётган тиббий асбоб-ускуналар белгиланган муддатларда метрологик кўрикдан ўтказилмаган ҳолда хизматлар кўрсатилгани, шунингдек, нархномада ҳисобга олинган, аммо амалда ишлатилмаган материаллар учун истеъмолчилардан қарийб 300 миллион сўм миқдорида асоссиз даромад олингани аниқланган.

Юқоридагиларга кўра, ҳудудий бошқарма махсус комиссияси томонидан “Истеъмолчиларнинг ҳуқуқларини ҳимоя қилиш тўғрисида”ги қонуннинг тегишли моддалари ҳамда Вазирлар Маҳкамасининг ушбу соҳада хизмат кўрсатиш асослари белгиланган қарори талаблари бузилиши юзасидан иш қўзғатилиб, ишни кўриб чиқиш якунида белгиланган тартибда истеъмолчилардан асоссиз олинган маблағларни қайтарилиши бўйича бажарилиши мажбурий бўлган кўрсатмалар берилди.

• Наманган
• SSV
• Тиббиёт