Спорт озуқаси сифатида кўрсатилган қўшимчалар ичидан қиймати 350 минг долларга тенг синтетик наркотик модда фош этилди.

Тошкент халқаро аэропортида божхона ходимлари синтетик наркотикларни биологик фаол қўшимча кўринишида олиб киришга уринган қўшни давлат фуқаросини тўхтатиб қолишди.

“Яшил йўлак” орқали ҳаракатланган йўловчининг сумкасидан спортчилар учун мўлжалланган 2 қути қўшимча топилди. Қадоққа кўра, ҳар бирида жами 760 дона оқ рангли капсула бўлиши керак эди. Аммо текширув давомида капсулалар сони 920 донани ташкил этгани, уларнинг ранги эса оқ эмас, балки сариқ ва қизил экани аниқланди. Бу эса маҳсулот қўлбола тарзда қадоқланганини кўрсатди.

Марказий божхона лабораторияси хулосасига кўра, капсулалар ичига “Альфа-ПВП” туридаги синтетик наркотик модда жойлангани маълум бўлди. Ушбу модданинг қора бозордаги қиймати 350 минг долларгача баҳоланмоқда.

Шунингдек, “Тошкент АЭРО” Ихтисослаштирилган божхона комплекси тезкор тузилмалари томонидан тадбир Юқори Чирчиқ туманида давом эттирилиб, йўловчи томонидан “закладка” усулида яширилган манзил ҳам аниқланган. Пана ҳудуд кўздан кечирилганида, 1 дона полиэтилен пакет кўмиб қўйилгани фош бўлди. Унда эса бир неча бўлакларда оғирлиги тахминан ярим килограм “гашиш” моддаси борлиги аниқланди. Мазкур ҳолат юзасидан божхона органлари томонидан жиноят иши қўзғатилган.

• Аэропорт
• Божхона
• Гиёҳвандлик
• Тошкент