Ижтимоий тармоқлар орқали Чорвоқ сув омборига канализация сувлари оқиб тушаётгани ҳақида эълон қилинган хабар юзасидан Давлат экология қўмитаси раиси Нарзулла Обломуродов бошчилигидаги ишчи гуруҳ томонидан Тошкент вилояти Бўстонлиқ туманида ўрганиш ўтказилди. Бу ҳақда қўмита ахборот хизмати хабар берди.

Қайд этилишича, Тошкент табиатни муҳофаза қилиш прокуратураси билан ҳамкорликда ўтказилган ўрганишлар давомида Бўстонлиқ тумани Новобод маҳалласидаги “Чорбоғ оромгоҳи”нинг юқори ҳудудида “Чимгонсой” сойидан оқиб ўтувчи сувлар автомобиль йўлининг таг қисмидаги қувур орқали сув омборига қуйилаётгангани аниқланган ва хабарда келтирилгани каби сув омборига маиший ва ишлаб чиқариш сувлари оқизилмаётгани маълум бўлган.

Шундан сўнг мутахассислар томонидан лаборатория таҳлили учун сувдан намуналар олинган.

Ишчи гуруҳ томонидан Чорвоқ сув омбори атрофида жойлашган хизмат кўрсатиш объектлари, тадбиркорлик субъектлари, жумладан, меҳмонхоналар, пансионатлар ва бошқа аҳоли дам олиш масканларининг оқова сувларни тозалаш ҳолати, шунингдек, Бўстонлиқ туманида аҳоли ва туристлар учун қулай шароитлар яратиш, мавжуд инфраструктурани янада яхшилаш, чиқинди тўплаш шохобчалари ва чиқинди қутилари тармоғини кенгайтириш масалалари ўрганилмокда.

• Chorvoq
• Тошкент