Дунёдаги энг йирик уяли алоқа операторларидан бири Британиянинг Vodafone компанияси Ўзбекистон бозорига киришни режалаштирмоқда.

Бу ҳақда 20 август куни Нукусда президент билан бўлиб ўтган учрашувда UzTex Group тўқимачилик компанияси таъсисчиси, InfinBank асосий акциядори ва бошқа тадбиркорлик субъектлари эгаси Фарҳод Мамажонов маълум қилди.

“Биз янги соҳада лойиҳа бошладик. Сиз кечаги йиғилишда рақамлаштириш ҳақида гапирдингиз. Яшин тезлигида ишлаш учун бизга яшин тезлигидаги интернет керак. Сиз хорижий брендни жалб қилиш бўйича кўрсатмалар бердингиз. Биз дунёдаги нуфузли компаниялардан бири Британиянинг Vodafone компанияси билан биргаликда Ўзбекистонда 5G Standalone мобил алоқасини йўлга қўйиш бўйича ишларни бошладик”, — деди у.

“Ҳамкор Британиянинг Vodafone бренди бўлади. Биз Perfectum компаниясини хусусийлаштирдик. Буни банк ичида ўрганиб чиқдик, хусусий тадбиркорларга қуйи бўғинда етиб бориш учун интернет керак. Бунинг учун Uzcard компанияси билан ҳамкорликда биргаликда инқилобий режага киришдик – Vodafone компанияси ташкил этилади. Худо хоҳласа, янги йилда ишга тушади”, – дейди тадбиркор.

Vodafone Group Plc қирқ йиллик тарихга эга ва 30 мамлакатда 434 миллион фойдаланувчи (дунёда China Мобиле’дан кейин иккинчи кўрсаткич) бўлган дунёдаги энг йирик телекоммуникация компаниялари гуруҳларидан бири ҳисобланади. Яна 50 та давлатда Vodafone тўлиқ назоратга эга бўлмаган тармоқнинг ҳамкори ҳисобланади. У овозли, хабар алмашиш, маълумотлар ва стационар алоқа каби кенг кўламли хизматларни тақдим этади. Шунингдек, компания Freedom Telecom билан ҳамкорликда Қозоғистон бозорига чиқишни режалаштирган.

Таъкидланишича, инвестициялар ҳажми 250 миллион еврони ташкил этади. Лойиҳа 2025 йилнинг биринчи чорагида бошланиши ва 1000 та иш ўрни яратилиши кутилмоқда.

“Ушбу технологиялар келяпти ва ўрнатиш ишлари олиб борилмоқда. Мазкур лойиҳани амалга ошириш учун “Ўзсаноатқурилишбанк” орқали Финландия экспорт агентлигидан 100 миллион евро сармоя жалб қилдик. Биз, таъсисчилар, ўзимиз 150 миллион евро йўналтиряпмиз. Шу пайтгача хорижий ва давлат (мобил) компаниялари бўлган, ҳозир эса миллий уяли алоқа операторини яратмоқдамиз”, — деди у.

• aloqa