Россия президенти Владимир Путин ҳар доим ворис ҳақида ўйлаши, аммо якуний танлов россияликларда бўлиши кераклигини айтди. Бу ҳақда у “Россия. Кремль. Путин. 25 йил” номли ҳужжатли фильмда маълум қилди.

“Мен доимо бу ҳақда ўйлайман. Бунга турлича муносабат бўлиши мумкин — олдиндан айтиб бўлмайдиган технологиялар бор, маъмурий ресурслар ҳам бор. Аммо барибир, якунда танлов халқнинг, Россия фуқароларининг, сайловчиларнинг қўлида”, – деди Путин.

У ҳар бир эҳтимолий номзоднинг салоҳиятини доимо кузатиб, баҳолаб бораётганини таъкидлади. Путин халқ ишончига эга бўлмаган шахснинг жиддий ишлар қилиш имконияти камлигини айтди.

“Мамлакатнинг барқарорлиги, ривожланиши ва хавфсизлигини таъминлайдиган шароитлар учун энг муҳим шарт — одамларнинг давлат раҳбарларига ишончидир. Бу ишончга эришиш учун эса, албатта, самарали ва ҳалол ишлаш, фуқароларимиз турмуш даражасини яхшилаш лозим”, – деди Россия президенти.

Путин ўз сўзида давом этиб, бугунги кунда мамлакатда камбағаллик даражаси энг паст кўрсаткичга эришганини мисол қилиб келтирди.

“Шубҳасиз, одамлар доимо келажакка умид билан қарайди ва вазият янада яхшиланишини истайди. Бу борада улар ҳақли, албатта. Агар халқ ишонса, асосий шарт — ҳокимиятга бўлган ишонч маълум даражада таъминланади. Бусиз жамият бирлиги бўлиши мумкин эмас.

Мен доимо шу ҳақда ўйлайман. Жамиятнинг ички бирдамлиги барча ютуқларимиз асосидир. Нафақат сайловларда, балки кундалик фаолиятимда ҳам менга билдирилаётган ишонч учун халқимиздан жуда миннатдорман. Бусиз яшаш ҳам, ишлаш ҳам мумкин эмас”, – деди у.

Путин, шунингдек, россияликларда танлов имконияти бўлиши учун бир нечта ворислар бўлгани маъқуллигини айтди. “Мамлакатни келажакда ким бошқариши ҳақида ўйлайсизми?” деган саволга у шундай жавоб берди.

“Менимча, мамлакат фуқароларининг ишончини қозона оладиган бир киши, ёки одамларга танлов имконияти бўлиши учун бир нечта шахс пайдо бўлиши керак”, – деди Россия раҳбари.

• Путин
• Россия