Жорий йилнинг ёз фасли қуруқ ва бироз иссиқ об-ҳаво билан бошланди. Бу ҳақда “Ўзгидромет” хабар берди.

1–7 июнь кунлари республика бўйича асосан ёғингарчиликсиз об-ҳаво кузатилади. Ҳаво ҳарорати аста-секин 35-38 даражагача, шимолда, жанубда ва чўл ҳудудларда 40 даражагача кўтарилади.

Кейинчалик ой охиригача ҳарорат 33-38 даражадан 25-30 даражагача ўзгариб туриши кутилмоқда. Республиканинг шимолий, жанубий ва чўл ҳудудларида энг иссиқ кунларда ҳарорат 39-41 даражагача кўтарилади. Биринчи ўн кунлик охирида, иккинчи ва учинчи ўн кунликларда айрим кунларда қисқа муддатли ёмғир ёғиши эҳтимоли бор.

“Ўзгидромет”нинг жаҳон прогнозлаш марказлари ҳисоб-китобларига асосланган дастлабки баҳосига кўра, бу йилги ёз фаслининг ўртача ҳарорати меъёрдан бироз юқори бўлиши кутилмоқда. Ёзги мавсум давомида, албатта, экстремал қийматларга яқин бўлган ҳаво ҳарорати билан жуда иссиқ об-ҳаво даврлари ҳам қайд этилади. Аммо ёз учун нисбатан қулай ҳарорат фонида иссиқнинг пасайиш даврлари ҳам кузатилади.

Маълумот учун, ҳар йили июнь ойида ўртача ойлик ҳаво ҳарорати май ойи қийматларидан 4-5 даражага, чўл ҳудудларда 6-7 даражага юқори бўлади. Сўнгги йилларда Ўзбекистоннинг барча ҳудудлари бўйича июнь ойининг ўртача ҳарорати барқарор ўсиш тенденциясини кўрсатди. Сўнгги 10 йилда Ўзбекистоннинг катта қисмида фақат 2019 йилнинг июнь ойи, шимолда ва чўл ҳудудларда эса 2017 ва 2018 йилнинг июнь ойлари меъёрдан бироз салқинроқ бўлган. Қолган йилларда июнь ойларининг ўртача ҳарорати меъёрдан юқори бўлган.

2021 йилдан 2024 йилгача бўлган июнь ойлари деярли барча ҳудудлар бўйича Ўзбекистондаги метеорологик кузатувлар тарихидаги энг иссиқ июнь ойлари бешлигига кирган.

• Об-ҳаво
• Ўзгидромет
• Yoz fasli
• issiq havo