Кактус медиа нашрининг хабар беришича, Қирғизистон Миллий хавфсизлик давлат қўмитаси раҳбари Қамчибек Ташиев аёлларни кўпроқ фарзанд кўришга чақирган.

Ташиевнинг сўзларига кўра, кўп болали оилалар мамлакат келажаги учун асосдир. Шу сабабли қирғизистонлик аёллар беш-ўн нафар болани дунёга келтириши керак.

“Биз кўп фарзандли бўлишимиз лозим. Аёллар, ёш келинлар бунга алоҳида эътибор қаратиши керак. Фақат шундагина Қирғизистон тараққий этиши мумкин. Давлат хавфсизлигини мустаҳкамлаш бевосита аҳоли сони билан боғлиқ. Агар аҳоли кўпаймаса, хавфсизликни таъминлаш мураккаб вазифага айланади. Ҳозирги кунда дунёда улкан ўзгаришлар содир бўлмоқда ва қўшни давлатлар аҳоли сони жиҳатидан биздан ўзиб кетмоқда. Биз бу масалага жиддий ёндашишимиз шарт”, – деб таъкидлаган Ташиев.

Шунингдек, у давлат туғилиш даражасини ошириш учун зарур шароитлар яратишга тайёрлигини айтган. Булар қаторига боғча, мактаб ва бошқа ижтимоий объектлар қурилишини киритган.

Бундан ташқари, Ташиев баланд тоғли ҳудудлар аҳолиси учун оналик капиталини жорий этиш бўйича ҳукумат режасини маълум қилган.

Унга кўра, мамлакатнинг айрим вилоятларида тўртинчи фарзанд учун 100 минг сом, бешинчиси учун 600 минг сом, еттинчиси учун эса бир миллион сом тўланиши кўзда тутилган.

• Қирғизистон