Маълум қилинишича, сўнгги йилларда ёшлар орасида турли жиноий гуруҳ ва субмаданиятларнинг таъсири кескин ошмоқда. Шулардан бири – А.У.Е. деб аталувчи жиноий ҳаракат бўлиб, у нафақат ўсмирларни, балки чет элга, айниқса Россияга бориб ишлаётган фуқароларимизни ҳам ўз домига тортаётгани билан жиддий хавотир уйғотмоқда.

“А.У.Е. ёшлар ва меҳнат муҳожирлари ҳаётини вайрон қилувчи хавфли тузилма. Нафақат ота-оналар, балки меҳнат муҳожирларини ҳам огоҳликка, ҳаёти ва эркинлигига бефарқ бўлмасликка чақирамиз”, – дейилади ДХХ хабарида.

А.У.Е. ўзи нима ва у қаерда шаклланган?

А.У.Е. (“Арестантский уклад един” — “Маҳбуслар қоидаси ягона”) — Россияда пайдо бўлган бўлиб, у ерда жиноятчиликнинг алоҳида шакли сифатида эътироф этилган хавфли ҳаракатдир. У “ўғрилар қонунлари”ни идеаллаштириб, қамоқхона маданиятини оддий ҳаётга сингдиришни мақсад қилган. Россияда бу ҳаракат 2020 йилда расман экстремистик ташкилот сифатида тақиқланган, унинг фаолияти учун жиноий жавобгарлик белгиланган.

Ўзбекистон фуқаролари нима учун огоҳ бўлиши керак?

Хабарга кўра, бу тузилма таъсири Россияда вақтинчалик ишлаб юрган айрим Ўзбекистон фуқароларига ҳам етиб бормоқда. ОАВ ва расмий манбаларда қайд этилишича, сўнгги йилларда бир нечта ўзбекистонликлар А.У.Е. ҳаракатини қўллаб-қувватлагани ёки унда иштирок этгани учун Россия қонунчилигига асосан жиноий жавобгарликка тортилган.

• ДХХ
• Ogohlantirish
• Ўзбекистонлик
• Россия
• хабар