Жаҳон олтин кенгаши маълумотига кўра, 2025 йил июнь ойида дунё бўйлаб марказий банклар жами 22 тонна олтин харид қилган. Бу талаб учинчи ой кетма-кет ўсишда давом этаётганини кўрсатади. Ушбу даврда энг йирик харидор сифатида 9 тонна олтин сотиб олган Ўзбекистон қайд этилди.

Ўзбекистон тўрт ойлик “сотув режими”дан сўнг бозорга қайтиб, яна олтин захираларини тўплашни бошлади. Бу ўзгариш мамлакатнинг валюта-олтин захираларини мустаҳкамлашга қаратилган стратегияси доирасида амалга оширилгани тахмин қилинмоқда.

Қозоғистон июнь ойида 7 тонна олтин сотиб олиб, иккинчи ўринни эгаллади. Хитой, Туркия ва Чехия эса ҳар бири 2 тоннадан харид қилган. Шунингдек, Гана, Қатар, Филиппин ва Қирғизистон бир тоннадан олтин сотиб олган давлатлар қаторида қайд этилган.

Мазкур ойда олтиннинг энг йирик сотувчиси Сингапур бўлиб, у 6 тонна олтин сотган. Бу ҳам марказий банклар захира сиёсатидаги фаол ҳаракатлардан далолат беради.

2025 йил бошидан буён марказий банклар жами 123 тонна олтин харид қилган. Бу ўтган йилнинг мос давридаги 130 тоннадан камроқ бўлса-да, юқори кўрсаткич ҳисобланади. Йил бошидан буёнги умумий савдо бўйича етакчилар қуйидагича: – Полша — 67 тонна; – Озарбайжон — 35 тонна; – Қозоғистон — 22 тонна. Ўзбекистон 18 тонна олтин сотиб олган ва бу борада етакчилар қаторида қайд этилган.

• Давхарид
• Олтин
• Ўзбекистон