Жорий йилнинг 2 сентябрь куни ижтимоий тармоқларда Элликқалъа туманида қизларнинг жанжаллашганлиги акс эттирилган видео тарқалди. Республика Оила ва хотин-қизлар қўмитаси ахборот хизмати ҳолат юзасидан қўшимча маълумот берди.

Ўрганиш натижасида мазкур видео Қорақалпоғистон Республикаси Элликқалъа тумани Марказий деҳқон бозори ҳудудида содир бўлганлиги аниқланган. Элликқалъа туманида яшовчи 2005 йилда туғилган вояга этмаган фуқаро Ш.Л, 2002 йилда туғилган фуқаро Б.З нинг номидан инстаграмм социал тармоғида аккаунт очиб, унинг номидан кириб юрганлиги сабабли улар орасида жанжал келиб чиққан.

Мазкур ҳолат бўйича Қорақалпоғистон Республикаси Оила ва хотин-қизлар қўмитаси раиси М.Ахмедова, Қорақалпоғистон Республикаси ИИВ Ҳуқуқбузарликлар Профилактикаси Бошқарма бошлиғи ўринбосари Т.Қарлибаева томонидан атрофлича ўрганилиб чиқилган ва маҳалла ходимлари билан биргаликда воқеа иштирокчилари ҳамда уларнинг ота-оналарига тушунтириш тарғибот ишлари олиб борилган.

Ушбу ҳолат бўйича Элликқалъа туман ИИБ ҳузуридаги Тергов гуруҳи томонидан терговга қадар суриштирув ишлари давом этмоқда.

• Қорақалпоғистон
• Самосуд