Россия газининг Қозоғистон орқали Ўзбекистонга транзити 2026 йилдан бошлаб тўрт баробарга, яъни 11 миллиард куб метргача оширилиши мумкин. Бу ҳақда Коммерсант хабар берди.

Сўнгги икки йил ичида Европага газ етказиб бериш тўхтаб қолгани боис “Газпром” учун Ўрта Осиё давлатлари ягона янги йўналиш бўлиб қолмоқда.

“Газпром” 2023 йил октябрь ойидан бошлаб Ўзбекистонга Ўрта Осиё—Марказ (САС) газ қувурлари тизими орқали тескари режимда газ етказиб беришни бошлади. Томонлар икки йил давомида ҳар йили 3 миллиард кубометргача экспорт қилишга келишиб олди. Энергетика ва молия институтидан Сергей Кондратевнинг таъкидлашича, Ўзбекистонга етказиб бериш нархи Туркияга (1 минг куб метр учун 270-280 доллар) ва Хитойга (1 минг куб метр учун 260-270 доллар) нисбатан анча паст. Ўзбекистонга Россия газини етказиб бериш қиймати 2023 йилда 1 минг куб метр учун 160 долларни ташкил этган.

Шунга қарамай, “Газпром” 1 минг кубометр учун 20-22 доллар фойда олишга муваффақ бўлди. Ўзбекистонга етказиб беришда экспорт божини бекор қилиш ва компаниянинг мамлакат ҳудудида газни қайта ишлаш лойиҳаларида иштирок этиши етказиб бериш рентабеллигини ошириши мумкин, дея қўшимча қилган у.

Сергей Кондратевнинг қайд этишича, Ўзбекистонда газ қазиб олишнинг камайишини ҳисобга олган ҳолда, 11 миллиард кубометр ҳажм Хитойга кейинги транзит ёки алмаштириш учун етарли бўлиши аниқ эмас.

“Менимча, Ўзбекистон 2030 йилга келиб Хитойга 5-6 миллиард кубометр экспорт қилиши учун импортни 15-18 миллиард кубометргача ошириши керак. Албатта, бу ҳолда биз нафақат Россиядан етказиб бериш, балки Туркманистондан импортни кўпайтириш ҳақида ҳам гаплашмоқдамиз”, - деди у.

• Газпром
• Россия