Оммавий ахборот воситаларининг хабар беришича, 7 майга ўтар тунда Кашмирнинг Покистонга қарашли қисмида портлашлар юз берди. Гувоҳларнинг сўзларига кўра, ярим тундан кейин Музаффаробод шаҳри атрофига ракета зарбалари берилган. Портлашлардан кейин шаҳарда электр энергияси таъминоти узилган.

Ҳиндистон Покистондаги “террорчилик” инфратузилмаларига қарши зарбалари берганини эълон қилди. Таъкидланишича, Ҳиндистон “Синдур операцияси” доирасида тўққизта объектга ҳужум қилган.

“Ҳиндистон Қуролли кучлари террорчилар лагерларига аниқ зарбаларни амалга оширди. Покистон ҳарбий объектлари ҳужумга учрамади”, – дейилади Ҳиндистон Мудофаа вазирлиги баёнотида.

Покистон Мудофаа вазирлиги Ҳиндистон мамлакат ҳудудига ракета зарбалари йўллаганини тасдиқлади. Шу билан бирга, Покистон “тегишли жавоб чоралари кўрилишини” таъкидлади. Покистон ўз ҳаво маконини барча парвозлар учун 48 соатга ёпди.

Покистон ва Ҳиндистон ўртасидаги муносабатлар 22 апрель куни Ҳиндистоннинг Жамму ва Кашмир штатидаги Паҳалгам шаҳрида қуролланган террорчилар 26 кишини ўлдириши сабабли яна кескинлашди. Ушбу теракт учун Кашмирнинг Покистон назорати остидаги ҳудудида жойлашган террорчилик гуруҳи жавобгарликни ўз зиммасига олди. Ҳиндистон ҳукумати ҳодиса юзасидан айбни Покистонга юклади. Мазкур ҳодисадан сўнг Ҳиндистон Покистон билан чегарани ёпди ва Покистон фуқароларидан мамлакатни тарк этишни талаб қилди. Ўз навбатида Покистон ҳам шундай жавоб чораларини кўрди.

• Ҳиндистон
• Покистон
• Raketa
• hujum