Эроннинг раҳбар органи — экспертлар кенгаши ўлдирилган Али Хоманаийнинг ўғли Мўжтабо Хоманаийни мамлакатнинг янги олий раҳбари деб эълон қилди. Бу ҳақда давлат органининг баёнотида айтилди.

Экспертлар кенгаши Ислом Республикасининг янги олий раҳбарини тайинлаш ҳақида қарор қабул қилгани ҳақидаги маълумотлар ОАВда кенгашнинг бир неча аъзосига таяниб 8 март тонгда пайдо бўлганди. Бу хабар Али Хоманаий АҚШ ва Исроил томонидан ҳарбий операция чоғида ўлдирилганидан бир ҳафта ўтиб тарқалган, аммо унинг айнан ким вориси бўлиши айтилмаган эди.

Аввалроқ, 3 март куни, 56 ёшли Мўжтабо Хоманаий Эроннинг янги олий раҳбари этиб тайинлангани ҳақида DW манбалари хабар берганди.

Исроил мудофаа армияси (САХАЛ) 8 март куни ўзининг Х ижтимоий тармоғидаги микроблогида Али Хоманаийнинг вориси бўлган ҳар қандай шахсни таъқиб қилиш ваъдасини яна бир бор такрорлади.

ABC News Трампнинг қуйидаги сўзларини келтиради: “Агар у бизнинг розилигимизни олмаса, у узоқ турмайди. Биз ҳар 10 йилда бу масалага яна қайтишга мажбур бўлмаслигимизга ишонч ҳосил қилишни истаймиз. Мен беш йилдан кейин бу масалага яна қайтиб, худди шу ишни қилишга мажбур бўлишимизни ёки, бундан ҳам ёмони, уларга ядровий қуролга эга бўлишга имкон беришимизни истамайман”.

Бундан аввал Трамп Эронда ҳокимиятга Мўжтабо Хоманаий келишига қарши эканини ва мамлакатнинг янги раҳбарини танлашда шахсан иштирок этиш ниятида эканини айтган эди.

Ислом Республикасини 1989 йилдан бери бошқариб келган Али Хоманаий 28 февраль куни Исроил ва АҚШнинг Эронга қарши уруши бошида ўлдирилганди.

Мамлакатнинг олий раҳбари Эронда экспертлар кенгаши аъзолари томонидан тайинланади. Ислом ҳуқуқи соҳасида мутахассис деб ҳисобланадиган 88 кишидан иборат ушбу давлат органи Эрон фуқаролари томонидан ҳар саккиз йилда бир марта сайланади.

• Eron
• Rahbarlik
• Тайинлов