Bloomberg'нинг ёзишича, дастлабки босқичда амалиёт одатий ҳарбий кампанияга ўхшаган, яъни қанотли ракеталар орқали тезкор ва кучли зарбалар берилган. Бироқ икки ҳафтадан кейин америкалик ҳарбийлар кутилмаган қийинчиликларга дуч кела бошлагани айтилмоқда.

Агентлик маълумотига кўра, нисбатан кичик ҳарбий бюджетга қарамай, Эрон катта қурол-яроғ омборига эга. Бу қуроллар йиллар давомида йиғилган, мамлакат бўйлаб тарқатилган ва яширин ҳолда сақланган.

АҚШ кучлари Эрон ҳужумларини қайтариш учун қиммат ва кам ишлаб чиқариладиган тутиб олувчи ракеталардан фаол фойдаланишга мажбур бўлган. Хусусан, Patriot PAC-3 тизимлари орқали ракета ҳужумлари қайтарилган.

Таҳлилчилар урушнинг дастлабки кунларидаёқ АҚШ ва унинг иттифоқчилари мингдан ортиқ шундай ракета сарфлаган бўлиши мумкинлигини билдиришган. Бу эса уларнинг йиллик ишлаб чиқариш ҳажмидан ҳам анча юқори.

Шу билан бирга, Пентагон маълумотларида АҚШ томонидан берилаётган зарбалар интенсивлиги 80 фоиздан ортиққа камайгани келтирилган. Аммо Теҳрон Яқин Шарқдаги ҳарбий объектлар ва энергетика инфратузилмасига ҳар куни ҳужумлар уюштиришда давом этмоқда.

Мутахассислар фикрича, можаро аста-секин қурол-яроғ захиралари бўйича рақобатга айланмоқда. Тадқиқотчи Келли Грико бу ҳолатни АҚШ бундай имкониятларга эга рақибга қарши биринчи марта уруш олиб бораётгани билан изоҳлаган.

Шунингдек, Center for Strategic and International Studies таҳлилчиси Марк Кансианга кўра, бу можаро амалда кимнинг ўқ-дори захираси аввал тугашини аниқлайдиган пойгага айланиб бормоқда.

• АҚШ
• Eron
• Уруш