АҚШ президенти Яқин Шарқдаги можаро фонида нефть нархларининг кескин ошиши вақт ўтиши билан тўғриланишини ва бу глобал хавфсизлик учун кичик тўлов эканини билдирди.

“Эроннинг ядровий таҳдиди бартараф этилгандан кейин тез орада пасаядиган нефть нархларининг қисқа муддатли ўсиши АҚШ ва бутун дунё учун хавфсизлик ҳамда тинчлик йўлидаги жуда кичик тўловдир. Фақат аҳмоқлар бошқача ўйлайди”, — деб ёзди у Truth Social ижтимоий тармоғида.

“9 март, душанба куни биржалар очилиши билан нефть нархи бир баррель учун 100 доллардан ошди, чунки Яқин Шарқдаги йирик энергия ишлаб чиқарувчилар нефть қазиб чиқаришни қисқартирди. Эталон ҳисобланган Brent маркали нефть фьючерслари қарийб 20 фоизга қимматлашиб, бир баррели учун 111,04 долларгача кўтарилди. Ҳолбуки, 28 февралдан бери давом этаётган Эронга қарши ҳарбий операция бошланишидан олдин, унинг нархи бир баррель учун тахминан 70 доллар атрофида эди. Американинг West Texas Intermediate (WТI) маркали нефть фьючерслари эса 16,8 фоизга ўсиб, 106,17 долларга етди”, – дея хабар бермоқда Реутерс.

Нефть бозоридаги энг муҳим омил бўлиб, Ҳўрмуз бўғозининг узоқ вақтга тўсилиб қолиши мумкинлиги ҳақидаги хавотирлар қолмоқда. Тинчлик даврида ушбу бўғоз орқали ҳар куни жаҳондаги нефть ҳажмининг тахминан 20 фоизи ташилади. У, шунингдек, масалан, Қатардан суюлтирилган табиий газни ташишда ҳам катта аҳамиятга эга.

Бу Россиянинг Украинага кенг кўламли босқини бошланганидан кейин, яъни 2022 йил февралдан буён кузатилган энг кескин ўсиш ҳисобланади. Ўшанда ҳам нефть нархи баррели учун 100 доллардан анча юқорига чиққанди.

• АҚШ
• Eron
• Isroil
• Трамп
• Уруш
• нефть