Исландия жануби-ғарбидаги Рейкянес ярим оролида вулқон отилди, натижада машҳур геотермал курорт Мовий лагуна ва Гриндавик кичик шаҳарчасини эвакуация қилишга тўғри келди. Бу ҳақда  "BBC" хабар беради.

Қайд этилишича, бу декабрдан бери ушбу ҳудудда бешинчи вулқон отилишидир.

Фавқулодда ҳолат эълон қилинган, бироқ Исландияга парвозлар таъсир қилиши кутилмаяпти.

Гриндавик мери Фаннар Ёнассон РУВ давлат телерадиокомпаниясига шаҳар томон оқиб келаётган лава ҳажмидан хавотирда эканлигини айтган.

Унинг сўзларига кўра, лава ҳажми охирги отилиш пайтида кўрилганидан анча катта.

Маҳаллий электр таъминотчиси HS Veitur маълумотларига кўра, Гриндавикда эҳтиёт чораси сифатида электр энергияси ўчирилган.

Маҳаллий матбуотнинг ёзишича, уч киши шаҳарни тарк этишдан бош тортган.

Кейинроқ расмийлар шаҳар ичида ёки яқинида қолиб кетганларни ҳудудни тарк этишга чақирди.

Рейкянес ярим оролида узоқ давом этган вулқон фаоллигининг охирги даври 800 йил олдин бўлиб, у пайтда отилишлар ўнлаб йиллар давом этган.

• Islandiya
• Вулқон